… Theofelus okwa ti Swapo ota lele fiyo euyo lomwene
Hamushangandjai woSwapo Sophia Shaningwa okwaamena omukalo welelo loSwapo, ta denge omufindo kutya okukala u shi Oshiingilisha itashi ti oto dulu okukulela nawa.
Shaningwa eshi kwa li ta popi koshoongalele shongudu Olomakaya kOkongo, okwa lombwela ovanhu ava hava kala tava pula ngee ovaleli voSwapo ove shi ngaa Oshiingilisha kutya eenghono davo odi dule okupopya Oshiingilisha nawa.
“Otushi shi kutya ovanhu vamwe okwa li va tumwa kofikola koSwapo ashike itatu efa nande ovanhu va tye fyee ovo ihatu popi Oshiingilisha katu na oshilonga. Otu na oshilonga,” Shaningwa osho a ti ngaho.
“Oshilongo inashi mangululwa nOshiingilisha. Ovanhu ohava hoolola ovaleli vavo shaashi ove hole oshilongo shavo, ove litula mo … ndee kaleni mushi shi kutya mekondjelo manguluko omwa fila vamwameme vahapu.”
Shaningwa okwa ti kapa li pu na efimbo lokuya kofikola pefimbo loita.
“Okwa li ashike pu na efimbo lokudenga omutondi nokumangulula Namibia,” Shaningwa osho a weda po ngaho.
Natango, minista womauyelele nomakwatafano opaungoba, Emma Theofelus, okwa ti epangelo loSwapo oli na okulela Namibia fiyo Jesus ota aluka.
Okwa ti Namibia oku li oshilongo shimwe shomoilongo ishona oyo tai lelwa nawa menenedu ndee ombili nelongelokumwe olotali tyapulwa kOvanamibia aveshe inali dja pokapala ka yela.
Eshi okwe shi popya pefimbo kwa li ta popi koshoongalele shishona osho kwa li sha ningwa kOshakati kolukanda hali ifanwa Onawa, Oshoondaxa.
“Otu na okukwashilipaleka kutya omanga omunhu ine ya koshoongalele otu na okumupula tete ngee oku na ngaa okakatala komahoololo. Otwa teelela eshiivifo longudu olo tali ke tuwilika pefimbo lokambaina opo tu kwashilipaleke kutya keshe omunhu okushi kutya Swapo okwa hala okushikula ondjila ilipi moule weedula nanho twa taalela, shaashi otu na okutwikila okukulele oshilongo eshi fiyo Jesus ote ya.
“Apa twa ninga nawa, natu pandulwe ndee apa twa pumbwa okulonga nelitulemo, natu wilikwe, ashike okutya epangelo loSwapo kali na eshi la ninga, kashi shi shoshili,” Osho a ti ngaho.
Theofelus natango okwa pula oilyo yoSwapo opo i kale tai limonikila ndee tai dja omaluvala ongudu nounwa.
“Hamunhu e mu shindi shaashi ongudu yotatekulululwa oyo ya eta emanguluko lokupopya nokuninga eshi twa hala, oshinima shimwe osho kwa li shihe shi shipu pefimbo loukoloni,” Osho a ti ngaho.
Okwa pula oilyo yoSwapo opo i ye momwaalu muhapu i ka hoolole Netumbo Nandi-Ndaitwah momahoololo oo ta eya.
Omundjadjukununi woikwapolotika Nduba Kamwanyah, nande ongaho, okwa ti eengudu domilameno otashi dulika di ka dule Swapo eenghono monakwiiwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
