Kakwa li nande nda endelela okuyaponhele yaGeingob – Mbumba

Pelesidente Nangolo Mbumba okwa ti kakwa li nande a hala okuya ponhele yaGeingob konima yokafimbo kashona eshi Geingob a xulifa. Eshi kwa li ta popi novaleli vopamufyuululwakalo vokonooli Olomakaya, Mbumba okwa ti eshi ovailonga pamwe naye moKabinete ve mu lombwela kutya oye tai ponhele yaGeingob efiku olo pelesidente mu kulu a xulifa, okwa pula kutya oshike oshinima shi li ngaho shi na okuningwa meendelelo.

Mbumba okwa ti Geingob omumwaina, kaume kaye yee ohaukwe waye.

Pelesidente mu pe okwa li ta lombwele ovaleleli vopamufyuululwakalo kombinga yaye, ovaleli ava okwa li va dja kOukwanyama, kOndonga, Uukwambi, Ombadja, Ombalantu, Ongandjera, Uukwaluudhi nUukolonkadhi. “Onda ti, ihatu teelele manga? Oshike hatu endeleleni? Ovanhu ova ti oshilongo itashi kala shihe na pelesidente. Ongaashi ashike etanga lopolifi. Itashi kala shihe na omutwe. Okwa li shi djuu,” Mbumba osho a ti ngaho. Okwa lombwela ovaleli ava kutya kapwa li nande oshinima inashi teelelika eshi a ya ponhele yaGeingob. Eshi osha landula omapopyo kutya Mbumba eshi a ya koshipundi shoupelesidente kasha li paveta yoshilongo.

“Okwa li nda hoololwa okupitila mopaliamente tete eshi nda hoololwa ndi ninge omupedu pelesidente woshilongo. Inandi dja ashike moixwa ndee handi ningi omupedu pelesidente,” Mbumba osho a ti ngaho.

Okwa weda po ta ti eshi a ya mombelewa youpelesidente, omupelesidente mu kulu Hifikepunye Pohamba okwe mu lombwela kutya ina ngwangwana.

“Okwa ti ino ngwangwana, ino faduka po ashike kala wa pama moilonga,” Mbumba osho a ti ngaho.

“Onde ya opo ndi mu lombwele kutya aame lyelye. Inandi hala okukala mombelewa inandi mu lombwela sha kombinga yange,” Osho a ti ngaho.

Mbumba okwa lombwela ovaleli vopamufyuululwakalo omanga ineva lombwela kutya oye lyee, kutya okwa li a ya koAngola nokoBotswana opo e ke va lombwele kutya oye lyelye, nota ka ya koSouth Africa konima yefimbo lixupi. “ Ovanhu vamwe otava ti, ou na oilonga iwa, oho li oikulya iwa, ou na otuwa iwa. Oilonga ei oidjuu, keshe efiku oto lombwelwa omahokololo a yooka a dja kovanhu va yooloka,” Osho a ti ngaho.

Okwa weda po vali ta ti eshi a ya mombelewa, okwa mona omapulo ahapu taa di kovanhu tave mu pula opo e va ninge ovakalelipo voshilongo koilongo ikwao. Ashike nee, ovakalelipo ovo tava longo paife kwa li va hoololwa kuGeingob, ovo ashike tava kala ko. Mbumba natango okwa kunghilila Ovanamibia opo vaha tukukauke medina lomahoololo opashiwana oo taa ka kala ko neudo, ashike nave uye kumwe. Okwa ti momudo womahoololo ovanhu vamwe ohava kala ve laameka kovaleli vamwe vopolotika.

Okwa ti eshi inashi ningwa momudo omu. Omunashipundi womalelelo ahetatu konooli, Herman Iipumbu, eshi a popya poshivilo opo tuu opo, okwa ti ovanafaalama konooli yoshilongo ova taalela onghalo tai nyemateke yokuhena dula, oimeno oya fya po nokapuna oikulya yoimuna yavo.

“Owe ya pefimbo olo oshilongo sha taalela omaudju mahapu. Ngaashi odula ei, inatu mona odula ya wana. Kamu na omeva moyana, kapu na omeva oimuna,” Iipumbu osho a ti ngaho. Ashike nee, Mbumba okwa ti, ombelewa yomuprima minista nomupedu prima minista otai ka tuma ovanambelewa opo va ka tale kutya ovanhu otava mono oixuna shi fike peni.