Minista woundjolowele Esperance Luvindao okwa lombwela ovanapaliamente ovo inava hala okulongifa oipangelo yepangelo kutya itava ka fininikwa ve shi ninge.
Okwa li ta nyamukula omapulo Etitatu kombinga yomalimbililo okufininika omaufemba ovanhu, sha landula elombwelo kutya ovanailonga vepangelo aveshe ovo ve na okakalata komayakulo opaunamiti nava longife oipangelo yepangelo okudja mulotete laApilili.
“Itatu dulu okufininika omunhu a longife oipangelo yepangelo nonghee nee, opu na omulandu wokuhoolola.
Keshe omunambelewa akula ngaashi ovanapaliamente, ngee owa mono kutya ino hala, ito fininikwa u shi ninge.
Ashike ngee owa hoolola uha longifa okakalata kopaunamiti, manguluka uhe shi ninge ndee to longifa oN$240 ndee to i kundokotola keshe wopaumwene,” osho a ti ngaho.
Okwa ti eli elombwelo okudja kupresidente olo kwa li la yandjwa momudo 2025.
She likolelela kuye, kapu na vali oshilongo shimwe muAfrica paife tashi fininike ovanambelewa vepangelo, mwa kwatelwa presidente, va longife oipangelo yepangelo oyo hava wilike ngee ova hala okulongifa okakalata komayakulo opaunamiti kepangelo.
Okwa popya kutya mangha oimaliwa tai longifwa okuyambula po oipangelo yopaumwene eedula dihapu, oipangelo yepangelo oya kala nokumona oixuna.
