Oshilyo shongudu yoIndependent Patriots for Change (IPC) Armas Amukoto okwa yandja ombedi komalelo opamufyuululwakalo molweyandjo lomadu la puka, mwa kwatelwa oulingilingi, olwaamambinga nokupatela kondje oshiwana osho tashi mono oixuna.
Oo e lile po ouministili womayambulepo eedoolopa noitopolwa yokomikunda okwa li a nyola komalungula ta holola eudolonai kombinga yomayandjo omadu.
“Omalelo opamufyuululwakalo naa kalele po oinima aishe ya puka oyo i li mosystema yokuyandja omadu. Omapuko aa omwa kwatelwa okuyandja omadu kovanhu ovo ve na nale, omatokolo a nyika olwaamambinga noulingilingi,” osho a ti ngaho.
Omapopyo aye okwe ya konima minista womayambulepo eedoolopa noitopolwa yokomikunda James Sankwasa a lombwela oshifokundaneki shoWindhoek Observer kutya oshiningwanima omo mwene womukunda u li koshi yelelo lopamufyuululwakalo laNdonga moshitopolwahoololo shaShikoto a yashwa osha etwa komapuko e li mosystema yonguduwiliki yomadu okomikunda.
Sankwasa okwa ti omawiliko omadu okomikunda okwa ninga odjo yeenamanana ponhele yokupotokonona eenamanana noministili otai ka longela kumwe noministili younamapya nounaimuna, eeshi, omeva nomatendululo omadu opo di ka ninge omapekapeko kombinga yomawiliko omadu okomikunda aeshe.Amukoto okwa ti minista ke udite ko nawa okatendo komatendululo omadu.
Okwa ti eyandjo lomadu komikunda oshinakuwanifa shomalelo opamufyuululwakalo, omangha onguduwiliki yomadu okomikunda i lile po okutalulula nokukoleka edu la yandjwa nale.
Amukoto Oshoondaxa okwa lombwela oThe Namibian kutya omumbwe yomilandu da yela di li pauyelele nopamufika oya eta omadu a kale taa yandjwa kovandjeko novanhu ovo ve na omakwatafano naavo have a yandje.
Okwa ti oshiwana osho sha hepa luhapu inashi kwatelwa mo.
“Omadu okomikunda paveta ohaa wilikwa komalelo opamufyuululwakalo opo oshiwana ashishe shi mone omauwa, ashike natango luhapu omulandu ihau yambulwa po.
“Omadu okomikunda okwa ninga unene odjo yokulimonena oiyemo yaavo tave a wilike, luhapu ohaa pewa ovo ve na oshimaliwa shihapu nande oshimaliwa shomalinyolifo oshishona.
Oshinima shi li ngaho otashi holola nale kutya osystema oya dopa,” Amukoto osho a ti ngaho.
Opo ku potokononwe oshinima eshi, okwa ti kutya ngeno oovene vomikunda nava pitikwe ashike va kale hava yandje ediminino lopetameko ndee omaindilo aeshe taa yandjwa konguduwiliki yomadu okomikunda opo a ka konakonwe nawa a dule okupula komesho ngee a pewa ediminino kolutu le lifikamena po.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
