Eefabulika dihapu ngeenge tadi nduluka oikutu, oha di nateke ko okambapila ke na ouyelele tau pukulula nghee oshikutu osho shi na okulongifwa.
Ashike nee, luhapu oumbapila ovo ovanhu ihae va lesha, ohava lande ashike oikutu yavo, vo otava mwena nokuli osho.
Ashike, e shi ngoo pwa pita efimbo linini sho oshikutu osho osha pomboka ile sha kanifa nale oluvala, nokonima tava lundile ovanduluki voshikuku kutya ohava nduluka oikutu ihe na ongushu.
Ashike mboli, ounatekwa ovo ve li koikutu, pefimbo limwe ohaa kala ashike e na edidiliko tali ti “oshikutu eshi ino shi djala pomutenya ile poutalala” ile “oshikutu eshi ihashi koshwa nofewa yombudu”.
Ove shaashi ino lesha, oto longifa nai oshikutu, eshi sha pomboka diva ove lundile eefabuluka. Ile, wa landa ekopi lokundjeneka omeva, ndele tete ino lesha kutya ohali longifwa ngahelipi, shaashi pefimbo limwe ohamu kala ashike mwa shangwa okuli “omeva otete aa to tula mekopi eli, naa kale e na omongwa” ashike shaashi ove ino lesha oto ke lihanga ashike to lundile ovachaina, shaashi ekopi owe li longifa papuko.
Nonghe, okukala kwetu mounyuni ou nako osho ku li ngaho.
Otwa pumbwa okulombwelwa nokulihonga kombinga yokukula mounyuni ou u yadi omashongo.
Noshimwe nee shomeedjo dounongo neshiivo osho omayeletumbulo.
Omayaletumbulo oitya oyo hai longifwa kovakulunhu mokulombwela, okulonga, okulondwela, okupukulula, okuhanyena ile okupashula ovanyasha nounona, moipambele yayooloka.
Moitya ashike nande itano yeyeletumbululo, otamu dulu okukala mu na elombwelo li na elondwelo loshiponga shonhumba to dulu oku ka shakeneka, ndele omolwo elondwelo olo wa mona kuyele, oto dulu okuxupifa nande omwenyo woye.
Pefimbo limwe nokuli eyeletumbulo ohali kala tali popilwa molupe loinamwenyo nomiti, mokufatulula omalihumbato omunhu weemhadi mbali. Elalakano linene lomayeletumbulo mahapu okweeta oshili ei kutya kape na ta dulu
okulikalela fiyo ofiyo, nokweeta eudeko kutya, onghalamwenyo oshitukulwa shovanhu aveshe, keshe umwe e na oushitwe wa yooloka kukeshe umwe, nonghee, opo aveshe va kale mewi limwe nova ninge osho sha yuka noshi li mouwa waaveshe, ope na okukala eemhango nelandulafano.
Mo momayeletumbulo omo nee hamu kala mwa tuvikilwa omauyelele mahapu e na ounongo wokushiivififa omunhu kutya oku na okulihumbata ngahelipi, eendjila dilipi e na okukala a henuka, oshike sha wapala naashi inashi wapala okuliningila nokuningila vakwao.
Pamufyuululwakalo wOshiafrika, unene wOvawambo, oinima ihapu ihai popiwa ile i tumbulwe komadina, opo nee u kale we i nongela nokushiiva ou na nee okukala, okuxungila pamwe novakulunhu ove u shiive omayeletumbulo oo a tuvikila ounongo neshiivo oto dulu okumona kofikola, nande ngoo ninga odjapo yopombada.
Otwa pumbwa okupwilikina nokuuda kovakulunhu vetu, shaashi ove na ounongo neshiifo lihapu, ova talela omaupyakadi nova lyata nale eendjila dihapu, nonghee, mopaife ovo ve li odjo yomayeletumbulo oo tae tu kwafele tuha ka lundile ounyuni, ngaashi hatu lundile eefabulika doikutu. Manga ino lundila ounyuni, pwilikina komayeletumbulo.
– Festus Hilifavali Hihalwa omupekaapeki nomuxwaxwameki welaka nomufyuululwakalo wOshiwambo, moNamibia nomoAngola.
Ota monika koemail ei: festushilifali@gmail,com
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
