‘Inatu hala we omalambo gomavi momudhingoloko gwetu’

Maria Shikongo

ENGUNGO enene lyaalilasa olya holoka mOlyomakaya pefumviko lya Maria Shikongo (20) ngoka a mana oondjenda momasiku 30 Desemba sho a gwile mondama yomalambo gomavi momukunda Ondando B momudhingoloko gwaNiipa.

Yina yanakusa, meme Marriane Penda okwa hokolola kutya omwana okwa li nuunkundi wopamadhiladhilo, nomesiku a mana oondjenda okwa li a zi megumbo nolwanima okwi itsuwika a kaama kombanda yomeya mondama.

Aakalimo yomomudhingoloko ngoka ngashingeyi oyi indile Uuministili wOmidhingoloko, Omakuti nOmatelelopo wu ninge nawa omalambo ngoka gomavi.

Penda okwa popi kutya hasho oshikando shotango ondama ndjoka tayi faalele omwenyo gwomuntu molwashoka omumvo gwa zi ko okwa li mwa hulithile kamatyona gwomimvo 11.

“Otwa hala oondama ndhoka dhomalambo ngoka gomavi dha ningwa nawa molwashoka otadhi mana po aantu,” osho a popi ngaaka.

“Otatu kanitha aantu oyendji momalambo ngoka. Osha geyitha ndje.

Uuministili osho wo elelo lyopamuthigululwakalo naya idhope mo moshinima shoka,” osho i indile ngaaka.

Mumwayina gwaPenda, Ananias Uugwanga, okwa popi kutya aakwashigwana yamwe oya kala taya hupithwa nokukuthwa moondama ndhoka dhomeya kAangola mboka haya longo momagumbo.

“Oondama ndhoka dhomalambo gomavi odha pumbwa okuningwa nawa molwashoka aantu oyendji oya hupithwa moondama ndhoka, yaali mwa kwatelwa mumwamemekadhona oya hulithila mo. Katu shi kutya olye a landula ko,” osho a popi ngaaka. Omukwashigwana momudhingoloko ngoka Jesaya Nambudunga, okwa popi kutya aantu ye li 10 oya hulithila moondama ndhoka dhomalambo gomavi.

Okwa popi kutya Teofelius Nghishidimbwa (11) okwa hulithile moondama ndhoka momasiku 30 gaMaalitsa omanga uumatyona uyali okwa li wa ningi elago sho wa hupithwa. Nambudunga okwa popi kutya Antonio Mathews okwa li a taambelwa moombete dhoshipangelo shaNandjokwe, moka a kala uule womwedhi e li mokoma, sha landula sho a kuthwa mondama yomalambo gomavi. Okwa popi kutya yalwe mboka kwa li ya hupithwa moondama ndhoka omwa kwatelwa Kandiwapa Xhuabeb, Shalongo osho wo Sakaria Philemon.

Nambudunga okwa popi kutya Jesaya Wanailonga okwa hulithile mondama yomalambo gomavi momudhingoloko gwaNiipa omimvo ne dha piti.

Andreas Andreas naAbsalom Ampweya oya mana oondjenda mo2008, sho ya gwile mondama yomalambo gomavi. Kansela gwoshikandjohogololo shaNiipa, Vilho Nuunyango okwa popi kutya okwa tsakanena naanambelewa yuuministili womidhingoloko, opolisi osho wo elelo lyopamuthigululwakalo lya Ndonga opo ku ningwe onkambadhala yokuninga nawa oondama ndhoka dhomalambo gomavi.

Omupopiliko guuministili womudhingoloko Romeo Muyunda okwa popi kutya aakwashigwana oya pumbwa okushangela uuministili ombapila ndjoka tayi holola omakemo gawo nomayele gaashoka ya hala kuningilwa.

“Itatu vulu okukatuka pwaana omakemo okuza kaakwashigwana,” osho a popi ngaaka.

Muyunda okwa popi kutya aantu mboka haya fulu omalambo gomavi oyo ye na okukala noshinakugwanithwa shokuninga nawa omalambo ngoka.

Okwa gwedha po kutya efulo lyomalambo gomavi olya hulithwa po kuuministili momudhingoloko gwaNdando.

“Omalambo ngoka ngashingeyi oga pumbwa owala okuningwa nawa,” osho a popi ngaaka.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!