Inamu teya po eengeleka, kwa tei po ashike eengangala – Olutu longudu yovakiliste

Pelesidente wehangano ledina Body of Christ Party (BCP), Festus Thomas okwa ti opolifi, pamwe nomalelo omifyuululwakalo naa xulife po okuteya po eengeleka doiveva.

Eengeleka ihadi ningi oimbuluma, ashike ovanhu mongeleka ohava ningi, osho ati ngaho.

Thomas oshinima eshi okwe shi pula momapulaapulo noThe Namibian Omaandaxa, sha shikula ongeleka oyo ya teywa po kOmusati nadikwao dimwe tadi teyaulwa po konooli yoshilongo.

Okwa ti vali ongudu yaye oya udifwa nai komapopyo ohamba yOndonga, Fillemon Nangolo Shuumbwa, oo ta ti elelo lavo itali pitike nande eengeleka odo tadi ningi dihapu moitopolwa oyo i li koshi yoshikandjo shaye.

Ohamba eshi oye shi popya petameko lodula ei koshoongalele shokomudo osho sha li kOnambango.

“Ito dulu okuteya po ongeleka yomunhu, shaashi eengeleka ihadi ningi oimbuluma, ovanhu ava ve li mongeleka ovo hava ningi oimbuluma. Oshike ashike opolifi itai mange po omunhu oo ta feekelwa a ninga oshinima shi i, ponhele yokuteya po ongeleka?
“Inamu teya po ongeleka, kwatei po ombudi,” Thomas osho a ti ngaho.

Ongudu oya yandja omukanda kungoloneya waShana Elia Irimari mOmaandaxa tai pula opo kuningwe oshoongalele pokati keengeleka doiveva nelelo lOndonga, tai pula opo ku xulifwe po okuteya po eengeleka kuhe li paveta nokukufa ko omaliko ado.

“Eengeleka edi otadi teywa po, oinima yado otai kufwa po kovaleli vopamufyuululwakalo moipafi yopolifi,” Osho a ti ngaho.
Thomas okwa ti ekotamhango otali popile eengeleka, ndee engeleka nadi ta mbulwe ko kepangelo.

“Eshi twa hala oshoongalele vali shimwe nepangelo opo li tu lombwele kutya edu letu oli li peni, ohatu pula eengeleka odo dihe na madu domoNamibia opo di kufe onghatu opo ku xulifwe po okatongotongo, oluhepo, okuhafikapamwe nokuninga eengeleka nai,” Osho a ti ngaho.

Thomas natango okwa ti elelo lopamufyuululwakalo waNdonga ola ti otali ka lwifa eengeleka doiveva.

Okwa ti eengeleka ohadi teywa po luhapu nomaliko ado ohaa kufwa ko medina ashike lomalundilo oo tadi ningilwa.

“Engeeleka oda ninga shike osho sha etifa opo opolifi i vatele mokudi teya po nokukufa ko omaliko ado moshilongo?
“Ongeleka otai dulu okuninga oshimbuluma? Eengeleka dopamhepo inadi pitikwa moshilongo?” Thomas osho a pula ngaho momukanda waye oo a shangela Irimari.

Ongudu oya pula opo epangelo li tye ko sha koshinima shi li ngaha kombinga yeengeleka doiveva.

Thomas okwa pula opo eengeleka di lopote keshe omunhu e li mongeleka ta longo ile ta feekelelwa oimbuluma.

“Itandi popile nande omufitaongalo ile oshilyo shongeleka tashi ningi oimbuluma. Keshe omufitaongalo ta kwata ovanhu keenghono, ta ningi ominyeka ile ngaa ta ningi keshe shimwe sha puka, onda yandja onomola yange yongodi kutya ovanhu nava dengele nge opo omunhu oo a mangwe po, opo ongeleka iha teyaulwe po.

“Ongela oyovanhu vahapu,” Osho a ti ngaho.

Petameko lodula ei, Nangolo okwa ti elelo itali pitike nande okuhapupala kweengeleka doshiveva moshitopolwa.

Okwa ti eengeleka dimwe doiveva oda topola omapata shaashi otadi lundilile ovanhu omaulodi pehe na oumbangi.