Inaku didilikwa nande omunhu a kwatwa kepulu loondjima – oministili youndjowele

Oministili youndjolowele nomayakulo opanghalafano oya koleka kutya kapu nande omunhu a kwatwa kepulu loondjima moshilongo olo li shiivike nawa nedina mpox, olo kwa li li shiivike nawa nale nedina monkeypox.

Eshi okwa li sha kolekwa komupopiliko woministili Walter Kamaya momukanda wokoikundaneki Etivali.

“Namibia ina koleka nande omunhu umwe a kwatwa kepulu eli. Shimwe vali, oministili oya hala okukwashilipaleka ovakwashiwana kutya Namibia okwe lilongekida okuyandja omayakulo koinima ya pamba oukolele yomeendelelo nosho yo komikifi odo tadi ya ngaashi ompox.

“Shi na sha neenhele dokutula ovanhu, oipangelo i li 25 yomoipangelo i li 36 moshilongo oi na eenhele da mangauluka dokutula ovanhu ovo taku feekelwa kutya ove na omikifi odo hadi tandavele diva,” Osho a ti ngaho.

Kamaya okwa ti Namibia oku na omashina anuninwa okumona oinima yoludi olo meendelelo nosho yo keshe shimwe sha pamba oundjolowele moNamibia, mwa kwatelwa epulo loludi eli. “Osystema yetu ohai kwashilipaleke kutya keshe omunhu ta ulike omadidiliko epulu eli ota monika mo diva, ta konakonwa ndee ta wilikwa. Mo26 Auguste 2024, oipangelo yaNamibia yepangelo noyopaumwe oya konakona ovanhu ve li 18 aishe kumwe opo i tale ngee ove na omukifi ou. Movanhu ava ve li 18, ve li 15 oidjemo yavo oya ulika kutya kave na sha epulu eli navatatu ova teleela oidjemo yavo natango,” Osho a ti ngaho.

Oministili youndjolowele natango oya ti vali ovanhu aveshe ovo va konakonwa ngee ove na epulo loludi eli ova talika ko kutya otava feekelwa ashike ve na oudu ou fiyo kwa monika omanyamukulo okudja kongulu yomakonakono opaunamiti.

Kamaya okwa ti ngee oindjemo yokongulu yomakonakono opaunamiti oya yela, ovanaudu ava otava twikile nokufilwa oshisho nokupewa epango lomaudu amwe e lili, ngaashi sha pumbiwa.

“Ohatu longifa eenhele di li 11 dokwiidilila ovanhu ovo ve na omaudu haa tandavele opo tu tule mo ovanhu ovo tava ka monika epulu eli ngee opa ka kala pu na omumbwe i li ngaho, shaashi eenhele dimwe dokwiidilila ovanhu odo kwa li di li moipangelo kwa li da ningwa pefimbo loKolona okwa li tadi longifwa vali oinima imwe yomayakulo opaundjolowele.

“Oministili oya finameka elineekelo loshiwana moinima youndjolowele. Ohatu pula oshiwana shi ngungumane noshi li kaleke kokule nokwaandjakaneka ouyelele inau kolekwa kombinga yompox ile keshe ngaa oshinima sha pamba oundjolowele woshiwana, shaashi eshi otashi dulika shi ete engwangwano inali pumbiwa,” Kamaya osho a ti ngaho.

Okwa ti ongehangano li na oshinakuwanifa shokulonga noinima ya pamba oundjolowele yoshiwana, oministili otai ka yandja ouyelele u li mondjila alushe, u na oshili nosho yo ouyelele wa pamba oundjolowele woshiwana pefimbo.

“Ohatu dimbulukifa oshiwana kutya ouyelele uhe li mondjila otau eta oumbada inau pumbiwa. Opo u kale u na ouyelele u li mondjila kendabala u lineekele eedjo dopambelewa – oministili youndjolowele nomayakulo opanghalafano nosho yo omahangano akwao opaundjolowele oo e na ondjokonona iwa,” Kamaya osho a ti ngaho.