Iitungithi ya thigwa po inaayi longithwa poshipangelo uule woomvula 9

Iituhgithi mbyoka ya nuninwa okutameka iilonga yokutunga po okapangelo kaamboka ye na uunkundi wopamadhiladhilo moshipangelo shaNankudu moshitopolwa shaKavango Uuniningino, sigo ongashingeyi oyi li pevi mpoka ya helulilwe mo2014.

Shoka osha landula sho Uuministili wUundjolowele nOmayakulo gOnkalonawa kwa li wa ningi onkambadhala yokwe eta po okapangelo kuundjolowele wopamadhiladhilo mo2013, ashike aakwashigwana otaku hokololwa kwa li ya tindi edhiladhilo ndyoka.

Uuyelele mboka owa gwandjwa pethimbo okomitiye yomutumba gwopashigwana miipambele yuundjolowele, onkalonawa niipambele yaaniilonga ya talelepo oshipangelo shaNankudu momudhingoloko gwaNkurenkuru, oshiwike sha zi ko.

Okomitiye ndjoka oya popi kutya oondhalate dhokuninga olugumbo ndhoka dha landwa mo2014 opo ku ningwe okapangelo kaantu mboka ye na uunkundi wopamadhiladhilo, inadhi longithwa sha sigo okeluwa ndika.

Iilonga yokutula po ondhalate yoshipa inayi tamekwa nonkene iilongitho oya kala owala mboka inaayi longithwa.

Ekondeina ndyoka lyi li popepi noondhalate ndhoka, oli na ooshako dhoosamende, ndhoka dha landelwe mo2014, nongashingeyi odhi na okukala dha kwisha.

Ashike nando ongaaka, omukuluntu moshipangelo shaNankudu, omundohotola Glesson Haihambo okwa lombwele oThe Namibian kutya mo2013 uuministili wuundjolowele okwa li wa ningi oshigongi naakwashigwana opo wu tseyithe edhiladhilo lyokutungitha po okapangelo kaantu mboka ye na uunkundi wopamadhiladhilo omolwonkalo yi li pombanda yaantu mboka ye na uunkundi wopamadhiladhilo moshitopolwa shawo.

“Osha dhimbululwa kutya moshitopolwa shaKavango Uuzilo noshaKavango Uuninginino omu na aavu oyendji yomapadhiladhilo. Opo kaaya kale we taya tumwa kOvenduka, okwa ziminwa opo pu tungwe okapangelo momudhingoloko ngoka gu na aantu oyendji ye na uunkundi wopamadhiladhilo,” osho Haihambo a popi ngaaka.

Konima yoshigongi shoka, aakwashigwana oya tindi edhiladhilo ndyoka lyokutunga okapangelo kaantu ye na uunkundi wopamadhiladhilo momudhingoloko gwawo.

“Etompelo ekwawo kwa li nda lombwelwa oondyoka kutya aakwashigwana oya hala pwa tungwa tango oshipangelo shopashitopolwa peha lyokutungwa tango oshipangelo shaamboka ye na uunkundi wopamadhiladhilo,” osho a popi ngaaka.

Omolwokukala inaaya adha etsokumwe naakwashigwana yomomudhingoloko, oprojeka yiilonga yokutunga inayi tamekwa we.

“Ashike nando ongaaka, uuministili owa adhika nale wa landa iilongitho niitungithi opo ehala ndyoka li tulwe tango molugumbo yo iilonga yokutunga okapangelo yi tameke,” osho Haihambo a popi ngaaka.

Ehala olya adhika nale lya tendwa ko ashike iilonga inayi tamekwa.

“Oshipangelo shaNankudu osho owala oshipangelo shi li mo oshinene moshitopolwa shaKavango Uuninginino,” osho Haihambo a popi ngaaka.

Haihambo okwa lombwele oThe Namibian kutya mekondeina kamwa li naanaa iitungithi oyindji.

“Iitungithi oyindji oya adhika opo tayi ya, ashike mbyoka yi li po oya adhika owala ya nuninwa okutamekitha oprojeka. Ashike molwashoka aakwashigwana oya tindi, oya thigwa owala mpoka,” osho a popi ngaaka.

“Ashike omathimbo gamwe oosamende ndhoka dhi li mekondeina ohatu dhi longitha po miilonga iishona ngaashi okuthitika omahala gominino dhonyata moshipangelo uuna dho opalekwa,” osho a popi ngaaka.

Okwa gwedha po kutya oosamende dhimwe okwa li dha longithwa po okutunga omikanka dhomeya pethimbo lyefundja.

“Kamu na sha lela mekondeina moka. Oondhalate ndhoka okwa li owala dha nuninwa okutula ehala molugumbo omanga iilonga yokutunga inaayi tameka,” osho Haihambo a popi ngaaka.

Sho a kwatathanwa naye, omukuluntuwiliki guundjolowele moshitopolwa shaKavango Uuninginino, Francisca Hamunyela okwa yamukula kutya okuli kundohotola gwe koshipangelo onkene ita vulu okutya ko sha manga, ashike okwa popi kutya ota galukile onzonkundaneki ndjika opo a tye ko sha.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.