Iimbuluma oyi indjipala moshitopolwa shaShikoto noopelesenda 35.5 momumvothimbo pashimaliwa gwo2025/26, moka iipotha yokudhengwa, yomakwatonkonga osho wo yiingangamithi oyo kwa konekiwa ya indjipala noonkondo.
Pauyelele wolopota okuza mombelewa yElelo lyOshitopolwa shaShikoto, iimbuluma 1 541 oya ndhindhilikwa momukokomoko gwethimbo lya tumbulwa pombanda, okuyelekanitha niipotha 1 137 mbyoka kwa li ya ndhindhilikwa momumvothimbo pashimaliwa gwa tetekele – ano yi indjipala niipotha 404.
Oshilyo shomutumba omutiyali gwopashigwana, kansela Vilho Nuunyango okwa pititha omukanda guuyelele mboka omasiku ga zi ko nokwa popi kutya iiningwanima yomadhengo nelalakano lyokweehameka oyo yimwe mbyoka yi igalala, noya londo okuza piipotha 567 okuya piipotha 945.
Iipotha yomakwatonkonga oyi indjipala okuza po132 okuya po187, omanga iipotha ya pamba elongitho lyiingangamithi oya londo okuza po87 okuya po159.
Iipotha yomadhipago oya londo okuza po13 okuya po16.
“Oyendji yomoonakuninga oshihakanwa aanona, naashoka otashi eta eikwato pomutima kombinga yegameno lyaanona nokwa pumbwa okutulwa omilandu dha yaga kegonga moshigwana dhekeelelo lyonkalo ndjoka,”osho Nuunyango a popi ngaaka.
Eyako lyiimuna, olyo hewa lya shuna pevi okuza piipotha 269 okuya piipotha 200, omanga iiningwanima yi na sha noonzo dhiinima ya gamenwa oya shuna pevi okuza po69 okuya po34.
