AMUSHANGANDJAYI gwewawa lyaanyasha moSwapo, Ephraim Nekongo, okwa ti ewawa lyaanyasha yoSwapo, SPYL, otali ka tidha oshilyo kehe tashi ka dhimbululwa tashi tuku aaleli miikundaneki yopaintaneta.
Ndhika Nekongo okwe dhi popi poshiithanene shiilyo yewawa lyaanyasha yoSwapo, shoka sha li koshitopolwa shaKavango East, pethimbo lyetalelopo lye koshitopolwa hoka.
“Itandi ka pitika nando evundakano mewawa lyaanyasha. Itashi ningwa pethimbo ndi li amushangandjayi. Otu shi shi nawa kutya ohamu tuku aaleli koFacebook,” Nekongo ta ti.
Nekongo okwa ti ewilikongundu otali ka katukila onkatu iilyo mbyoka tayi ka tsikila oku shi ninga, ta gwedha po kutya ooveta nomautho ngoka ga kuthilwe koZambezi oge na okutulwa miilonga kiitopolwa ayihe.
Okwa ti molwashoka okakomitiye opo nale ke li, haye ta ka tidha mboka taa kawula onyanga, ihe oko take ke ya tidha.
Nekongo okwa tsikile ko ta ti nando naye oha tukwa okupitila miikundaneki, ye ke na ko nasha.
Okwa gwedha po wo kutya ita ka pita iilyo yewawa lyaanyasha yi kale yi na ekwatathano noongundu dhilwe dhopapolitika, ngaashi APP nenge PDM.
Amushanga gwewawa lyaanyasha yoSwapo okwa ti iilyo yimwe oya fuulwa komukalo McHebry Venaani (omupresidente gwo-PDM) ha popi, tayi ti okuvule niilyo yimwe yongundu.
Okwa ti oshihwepo mboka taa ti ngaaka ya ndjoyine oongundu dhimwe, molwashoka moSwapo oya fa ashike yi iholekela mo.
“Nomomagumbo geni ihamu tuku aavali yeni. Aakuluntu yeni ihamu ya tuku nando momagumbo geni omu kale mu na uupyakadhi. Ano otu ukeni peni ongoshigwana?” Nekongo ta ti
