Iilonga yokwoopaleka oshipangelo shaKatutura oya tameka

Uuministili wIilonga nIiyenditho owa tseyitha kutya owa gandja oshimaliwa shoomiliyona N$40 okulongitha oshipangelo shepangelo shaKatutura mOvenduka shoka sha kala tashi nyenyetwa shi li moonkalo ya nayipala.

Oshipangelo shoka osha tungilwe po mo1973 pethimbo lyepangelo lyuukoloni nongashingeyi oli na omatungo gamwe oga tenda omisa, omakende ga tatuka, uundjugo wa teka osho wo yilwe.

Okuza omimvo dha piti, aavu yamwe mboka kwa li ya taambelwa moombete dhoshipangelo shoka okwa li ya popi kutya ohaya yugathana iikulya noombuku.

Uuministili mboka, pethimbo lyoshigongi shiikundaneki uunambo, owa popi kutya nonande oshimaliwa shoka osha gandjwa pwa pita ethimbo, ekateko okwa li lye etwa kUuministili wUundjolowele nOmayakulo gOnkalonawa opo iilonga yi tamekwe.

Omupopiliko guuministili wIilonga, Julius Ngwedha, okwa lombwele iikundaneki kutya ngashingeyi iilonga yokwoopaleka oshipangelo shoka oya tameka.

“Uupyakadhi okwa li we etwa kuuministili wuundjolowele mboka kwa li inaawu ninga omalongekidho gokulundululila aavu komikunda dhilwe opo ku gandjwe ompito kaaniilonga ya tameke nokwoopaleka omatungo naampoka pwa pumbwa oku uthwa, onkene shoka osho sha li tashi shongolitha iilonga,” osho a popi ngaaka.

Pauyelele wa zi kuNgwedha, uuministili wawo okwa li wa pula oshimaliwa shokwoopaleka oshipangelo okuza kuuministili wiimaliwa noye shi pewa nale omumvo gwa zi ko.

Ashike nando ongaaka, okwa popi kutya okuna eikwato pomutima kombinga yethimbo ndyoka lya pwa ko, molwashoka oshimaliwa shoka oshi na okukala ando sha longithwa manga omumvo nguka pashimaliwa inaagu pwa ko momasiku 31 Mallitsa.

Pamulandu, uuna oshikondo shepangelo sha pewa oshimaliwa okuza moshigandhi shepangelo ndele inaye shi longitha ohaya pulwa ye shi shunithe koshimpungu shiiniwe yepangelo, pehulilo lyomumvo pashimaliwa.

“Ngele otwa kala inaatu longitha oshimaliwa shoka ashihe, nena otatu ke shi kaleka opo kaashi shunwe koshimpungu shiiniwe yepangelo,” osho Ngwedha a popi ngaaka.

Kakele kwaashoka, Ngwedha okwa gwedhapo kutya uuministili owa mona wo oshimaliwa shoobiliyona N$2 okuza kombaanga yoSouthern African Development Bank, notashi ka longithwa koompumbwe dhehangano lya yama kepangelo lyaTransNamib.

“Oshimaliwa shoka otashi ka longithwa okulanda omashina gokolutenda omape ge li 25 goTransNamib,” osho a popi ngaaka.

Okwa gwedhapo wo kutya oya kala noonkundathana nomahango goondhila ngoka ge na ohokwe yokuya ga longele moNamiba.

“Kapu na nande edhiladhilo lyokugalula oAir Namibia, ashike otwa kala tuli mekwatathano nomahangano goondhila gokoTurkey nokoEmirates noge na ohokwe yokuya ga longele mewangandjo lyetu,” osho Ngwedha a popi ngaaka.

Poshigongi shoka shiikundaneki, minista gwiilonga niiyenditho John Mutorwa okwa popi kutya omumvo nguka ogwomahogololo, nopuna oshindji sha tegelelwa, unene tuu okuza koongundu dhopapolitika.

“Oongundu dhopapolitika otadhi ka kala dhi li kehe pamwe, tadhi kutha ombinga momahogololo nelalakano lyokumona uuleli osho wo okumona oshinakugwanithwa shokuwilika iinyangadhalwa yepangelo. Oshayela kutya opu na oshindji sha tegelelwa,” osho Mutorwa a popi ngaaka.

Okwa gwedha po kutya mEkotampango, oongundu dhopapolitika otadhi ka gandja omikandauvaneko dhawo okuyelitha shoka yi itayela musho osho wo shoka taya ka ningila aashikwashigwana ngele ya sindana.