Iihokolola yoshipotha shaanandjungu yu undulilwa komeho

Iihokolola yaanandjungu Dimbulukeni Nauyoma osho wo Michael Amushelelo, mboka taya tamanekelwa okukala yu unganeka ehololomadhiladhilo ndyoka kwa li inaali pitikwa lya li kombinga yonkalo yokwaana iilonga moshilongo, oyu undulilwa komwedhi tagu ya.

Mangestrata Linus Samunzala oku undulile iihokolola yaafekelwa mboka komasiku 11 Kotoba, mompangu yamangestrata gwaVenduka moKatutura uunambo, nonande Nauyoma naAmushelelo inaya holoka mompangu esiku ndyoka.

Iihokolola mbyoka tayi ningilwa aalumentu mboka oya tameke iiwike itatu ya piti, nokwa li yi na okutsikila mEtiyali lyoshiwike shika ashike oya kalekwa molwashoka Nauyoma kali ta vulu okuholoka omolwuuwehame.

Ishewe nando ongaaka, Amushelelo naye kompangu ina holoka. Hahende gwe Samuel Kadhila okwa lombwele ompangu kutya Amushelelo okwa ndopa okuholoka kompangu molwashoka opolisi sho ye mu kutha mondholongo oye mu fala kompangu yamangestrara gwaVenduka ndjoka yi li mepandaanda lyedhina Judge JP Karuaihe Street peha a falwe kwaandjoka yi li moKatutura.

Nauyoma naAmushelelo otaya ikala kutya kaye na nande ondjo ya sha momatamaneko ngoka ya taalela ge na sha nokwe eta evundakano moshigwana, eyono lyomaliko osho wo okuhwahwameka evundakano moshigwana.

Otaya tamanekelwa iipotha mbyoka sha landula sho kwa li yu unganeke ehololomadhiladhilo li na sha nonkalo ya yaga kegonga moshilongo yokwaana iilonga, nokwa li ya thaneka li ningwe mEsiku lyEmanguluko, momasiku 21 Maalitsa numvo.

Pehololomadhiladhilo ndyoka Nauyoma naAmushelelo okwa li ya waiminwa koshilyo shongundu yoPopular Democratic Movement megumbo lyopashigwana, Inna Hengari.

Pamulandu ehololomadhiladhilo kehe ohali ningwa papitikilo lyopolisi molwashoka oyi na okukaleka po elandulathano negameno, ashike sho aaunganeki yehololomadhiladhilo ndyoka ya ningi eindilo kondjayi yetanga lyopolisi moshilongo Joseph Shikongo, olya tindwa noya lombwelwa kutya naya konge esiku lilwe moka taya ningi ehololomadhiladhilo ndyoka, kaali shi mEsiku lyEmanguluko.

Shikongo pethimbo ndyoka okwa gandja etompelo kutya okwa tindi ehololomadhiladhilo ndyoka li ningwe mEsiku lyEmanguluko “omolwomatompelo ge na sha negameno”

Ashike nando ongaaka, onkene aanandjungu mboka ya pula komeho neholomadhiladhilo mesiku ndyoka, sho engungo enene moka oyendji yomuyo aagundjuka ya gongala pendiki lya-Katutura Youth Complex.

Lwanima opolisi oya holokele po nokuhalakanitha po engungo ndyoka koonkondo, naashoka oshe eta Nauyoma, Amushelelo naHengari ya tulwe miipandeko.

Hengari okwa pewa oboloha yooN$5 000 konima sho a kala mondjeedhililo uule womasiku gatatu, konima yiiwike iyali e li mokalimosho, Nauyoma naye okwa pewa oboloha yooN$5 000, ashike Amushelelo okwa kala ta tindilwa oboloha nosigo onena onkene e li mongali.

IIHOKOLOLA

Momasiku 25 Auguste sho ayehe yatatu ya holoka mompangu, iipotha mbyoka Hengari kwa li a taalela oye ekelwahi nokwa mangululwa, omanga Nauyoma naAmushelelo oya lombwele ompangu kutya kaye na nande ondjo ya sha ya ninga mesiku ya tulwa miipandeko.

Mesiku ndyoka lyiihokolola aapolisi yatatu oya kalelepo epangelo ongoombangi ndhoka dha li poshingwanima shoka.

Yaali yomaapolisi mboka, oya lombwele ompangu kutya Amushelelo naNauyoma oya adhika nale ye li mondholongo pethimbo oshihauto shopolisi sha dhengwa kaashigwana – oshiningwanima shoka she eta Nauyoma naAmushelelo ya kale ya taalela oshipotha sheyonagulo lyomaliko.

Otaku hokololwa kutya ekende lyoshihauto shopolisi olya dhengwa mo kaahololimadhiladhilo pethimbo taya halakanithwa po kopolisi.

Pauyelele waagandji yuumbangi, aahololimadhiladhilo okwa li taya ende mongundu momapandaanda gaKatutura konima sho ya lombwelwa ya halakane mpoka kwa li ya gongala.

Aagandji yuumbangi mboka oya tseyithile wo ompangu kutya aahololimadhiladhilo oya geye sho Nauyoma naAmushelelo ya kwatwa po kopolisi noya tameke okuvundakanitha.

Amushelelo onkene ta tsikile nokutindilwa oboloha, nomwedhi gwa zi ko okwa fala oshipotha she kompangu yopombanda yaVenduka opo omatompelo goku mu tindila oboloha ga talululwe ye a vule okupewa oboloha, ashike etalululo ndyoka olye ekelwahi, ngashingeyi otayi kompangu yashiga ko moshilongo opo a tale ngele etalululo ndyoka tali e ta a pewe oboloha.

ONDJALA YIILONGA

Ehololomadhiladhilo ndyoka okwa li lyu unganekwa kuAmushelelo opamwe naanandjungu okwa li lya hwahwamekwa konkalo yaagundjuka omathele mboka kwa li ya holoka pehala lyomainyanyudho lyedhina Temperature Lounge and Restaurant tali adhika momudhingoloko gwaKhomasdal mOvenduka, opo ya gandje omaindilo goompito dhiilonga ndhoka dha li po.

Otaku hokololwa kutya pehala ndyoka opwa li oompito dhiilonga 16, ashike aagundjuka ya konda po2 000 kwa li ya holoka okugandja omaindilo gawo.

Konima ashike yoshiwike, aantu omathele oya mbombolokele pofabulika yoohi, Omualu Fishing, mOmbaye okukonga iilonga sha landula sho aantu kwa li ya taambathana etumwalaka kutya oyu uvu ehangano ndyoka tali kutu.

Lwanima, omupopiliko gwopolisi moshilongo, omupevikomufala Kauna Shikwambi, okwa tseyitha kutya opolisi okwa li ya yakula omaindilo ge li 42 967 gaamboka ye na ohokwe yokutaambwa mekuto lyoopoosa 1 000 dhopolisi.

Omwedhi gwa zi ko, omuyalulindjayi gwoNSA, Alex Shimuafeni, okwa tseyitha kutya oya yakula omaindilo ge li 101 009 goopoosa 13 000 dhiilonga yoondondo dha yooloka dhaamboka taya kwathele momayalulo gomagumbo naakwashigwana ngoka ge li metifa.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.