Omunangeshefa Erastus ‘Chicco’ Shapumba okwa ti ina shanga nande eudafano lohiila yetungo laye, olo vati hali hiilwa kepangelo komiliona oshinghwanyu imwe komwedi, nande epangelo ihali li longifa sha.
Eshi oshe ya eshi oministeli woilonga noyeendifo ya lombwela oThe Namibian kutya oya faneka okuxulifa po eudafano lohiila eli naShapumba.
Tete oThe Namibian okwa li ya lopota kutya eudafano eli lohiila okwa li la shainwa muDesemba 2023 nokwa li li na okuya fiyo omido nhatu.
Shapumba okwe lipopila, ta ti ina kufa nande ombinga eshi okondalaka ei ya ningwa.
“Kanda li po. Inandi shanga eekondalaka.
Ou shi shii kutya kandi shii okulesha,” osho a ti ngaho.
Shapumba okwa lombwela oThe Namibian Etivali la dja ko kutya oohaende vaye novepangelo ovo va li po poshinima apa.
“Ihandi shange eekondalaka, ohadi ningwa koohaende mwa kwatelwa Sisa Namandje.
Onda shaina ashike,” osho a ti ngaho.
Shapumba okwa ti epangelo nali pitife omusholondodo womatungo aeshe opaumwe oo tali hiila opo ku ningwe omafaafano opauyuki.
“Oimaliwa oyo hai futwa kepangelo itai dulu nokufuta oimaliwa yetungo olo yombaanga,” osho a ti ngaho.
Namandje, oo a tumbulwa kuShapumba ongoumwe womovakalelipo, okwa ti ke na oufemba wokupopila ko Shapumba.
“Kandi mo meenamanana ile moshikumungu osho e na noministeli.
Onghee nee, popya naShapumba yeemwene,” Namandje ta ti.
‘OMBEDI OYEPANGELO’
Oshilyo shopalimente shongudu yoIndependent Patriots for Change (IPC) Armas Amukoto, ombedi okwe i pa epangelo eshi tali twikile nokuhiila etungo ihali longifa sha.
Amukoto okwa lombwela oThe Namibian Etivali la dja ko kutya ke li ominge nokukonakona oshinima eshi, ashike naku talwe kovanambelewa vepangelo ovo va li va dimina ile va kundafana kombinga yoshinima eshi.
“Ngee opu na omunhu ta li ko sha, nava ungaungwe navo,” osho a ti ngaho.
Amukoto okwa pula kutya omolwashike ehandu loshiwana la yukifwa unene kuShapumba, ta ti epangelo nali ete pouyelele omaudafano ohiila a fa eli.
“Omolwashike ashike va yuka mOvanamibia?” osho a ti ngaho.
“Oku na etungo lOvachina kOmuthiya, ndee vati otali hiilwa koministili yoikwameni.
Otava futu ingapi?” osho a pula ngaho.
Amukoto okwa ti oshiwana osha hala okushiiva kutya olyelye a dimina ohiila yetungo ‘laChicco’, olyelye a kundafana oshinima eshi nongee omilandu domondjila okwa li ngaa da landulwa manga eudafano eli inali shainwa.
Omundjadjukununi woikwapolitika Ben Mulongeni, okwa lombwela oThe Namibian kutya ombedi nai yukifwe kepangelo, ndee kashi shii kuShapumba.
“Ovanhu ovo ve li mepangelo kwa li ve na okufila oshisho eliko lepangelo, ova efa omunhu a pule komesho nasho.
Onghee nee, natu yandje ombedi kepangelo,” Mulongeni ta ti.
Mulongeni okwa ti omapuko itaa popilwa taku longifwa oiholelwa ya nafangwa.
“Osha puka, kutya nee osha ningwa kovaengeli ile okuina yaJesus, osha puka,” osho a ti ngaho.
Mulongeni okwa weda po kutya ovanambelewa vepangelo ove na oshinakuwanifa shokwaamena omaliko oshiwana ndee itava dulu okuyukifa ombedi kovanhu paumwene konima va dimina omaudafano a tya ngaho.
“Kandi wete ngee Chicco okwa puka.
Epangelo olo li na oulingilingi, shaashi olo li kwetele oshinima eshi komesho,” osho a ti ngaho.
Mulongeni oshinima eshi okwe shi yeleka nomunailonga womofitola ta pitike ovanhu va ye noinima inai futwa.
“Oto ti ohatu ke va konga ve uye va fute? Itatu shi ningi.
Omunhu ou kwa li e na okufila oshisho ofitola yoye na fute,” osho a ti ngaho.
Eshi a nyamukula oThe Namibian, omukulunhuwiliki woministili yoilonga noyeendifo Jonas Sheelongo okwa ti oshikumungu oshi li momake oveta.
Sheelongo okwa ti etokolo lepangelo kombinga yohiila inali lunduluka natango.
“Epangelo ola ninga nale etokolo lokuxulifa po ohiila ei, ndee natango etokolo eli oli li ngaashi li li,” osho a ti ngaho.
Sheelongo okwa ti oshikumungu natango otashi talululwa, nomayele okudja kombelewa yahaendendjai neenghundafana namwene wohiila.
“Osho handi koleke osheshi kutya oministeli oye litula mokulonga mouwa woshiwana tai wilikwa koveta,” Sheelongo ta ti.
