Herunga a fiya po ouwiliki woilyo yoSwapo mopaliamente

Omupedu hamushangandjai woSwapo Uahekua Herunga okwa fiya po ouwiliki woilyo yoSwapo mopaliamente sha landula vati omikundu okudja kongudu yovanyasha ovo ve li mopaliamente.

Efiyepo loilonga ei laHerunga okwa li la shiivifwa Etitatu komunashipundi wopaliamente Saara Kuugongelwa-Amadhila pefimbo lomutumba wopaliamente.

Minista woilonga noyeendifo mukulu Alpheus !Naruseb okwa ulikwa oye a ninge omuwiliki mupe woilyo yoSwapo mopaliamente.

Omunapaliamente woSwapo, eshi a popya noThe Namibian Etitatu, okwa ti Herunga okwa fiya po oilonga ei kuye mwene molwokuhatwa kumwe noilyo yopaliamente yovanyasha kombinga yomilandu dopaliamente.

“Okwa li pu na omakondjifafano ahapu okudja kongudu ipe yoilyo yopaliamente kombinga yomukalo ou va hala oinima i ningwe naasho kwa li ta ningi.

Okwa mona kutya oshi xwepo a fiye po oilonga ei opo omunhu umwe a twikile ko. Ovanhu ovo okwa li lela tave liumbata nai,” odjo osho ya ti ngaho.

“Okwa mwena, ndee ova tameka okuningila oinima owina molwemweno laye. Okwa li pu na omalunduko ahapu. Oilyo okwa li unene tai pangele omuwiliki, nokwa li unene ve mu lambalala.

Okwa mona kutya pamwe okwa puka, onghee nee okwa fiya po oilonga. Kakwa li a hala okulwa.”

Herunga okwa koleka koThe Namibian kutya okwa fiya po oilonga ei, ndee ta ti etokolo eli olopaumwene.

Okwa yeleka kutya ota twikile okukala oshilyo shopaliamente.

“Etokolo okwa li lopaumwene nonda tokola okufiya po omhito yange youwiliki woilyo yongudu mopaliamente,” osho a ti ngaho.

Efiyepo loilonga ei laHerunga olo lotete omuwiliki woilyo yoSwapo mopaliamente ta fiye po oilonga ei omangha natango e li oshilyo shopaliamente.
Pakuyelakanifa, eshi omuwiliki woilyo yoSwapo mopaliamente mukulu Ben Amathila a fiya po oilonga ei momudo 2007, okwa li yoo a fiya po

oshipundi shaye shopaliamente nokonima okwa li a pingenwa po kuHage Geingob.

Oshilyo shikulu shopaliamente Nahas Angula okwa yeleka efimano loilonga yomuwiliki woilyo yongudu mopaliamente.

“Omuwiliki oha unganeke nokuwilika oyoongalele yongudu mopaliamente.

Oha kwashilipaleke kutya oilyo yopaliamente oya holoka komitumba nokulongela kumwe novawiliki vakwao okudja keengudu dikwao,” Angula osho a ti ngaho.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.