Hahende oo a kalela po minista mukulu wounamapya nounaimuna, eeshi, omeva nomatendululo omadu Mac Hengari okwa pula opo a pewe okopi yoindjemo yomakonakono okutala ngee Hengari oye xe yokaana kanakuningwa oshihakanwa a ningwa pefimbo lomakonakono oshibofa shekwatongonga sha kwatela mo Hengari ongomutamanekwa.
Oshinima eshi osha pulwa momukanda oo hahende Patrick Kauta wokehangano lovakaleipo vopaveta ledina Dr Weder, Kauta & Hoveka Inc kwa li a popya nomutamaneki womhangu yamagestrata yaVenduka Etitano.
Momukanda, Kauta ota ti vati Hengari okwa li a mangwa po pu na oshifokundaneki, osho kwa li sha pitikwa shi faneke oinima aishe oyo ya li ponhele opo a mangelwa po puhe na omukundu washa, “shi lengife omufeekelwa nokuxwaxwameka omaliudo oshiwana naasho sha hala”.
Omutulimo woshibofa oo ta lundile Hengari kutya okwe mu kwata keenghono naye okwa li a kalelwa po ponhele opo Hengari a mangelwa momafiku 26 Apilili, konima omukulunhu wopolifi yaNamibia komufalandjai Joseph Shikongo kwa li a endululwa ta popi moikundaneki ta ti nakutula mo oshibofa oku li meumbo laamenwa, Kauta osho a ti ngaho momukanda waye.
Okwa ti kutya omukalelipo woshifokundaneki oo a li po pefimbo Hengari ta mangwa po okwa ulika “kutya opolifi oi na mo sha moshimbuluma omu”, Kauta osho a ti ngaho momukanda waye: “Oto tukumwe naame kutya mekotamhango loudemokoli ngaashi letu opolifi oi na okukala kokule noinima yopolitika.”
Kauta natango momukanda okwa ti kutya omukulunhuwiliki woshikondo shopolifi yaNamibia shokuninga omakonakono opaungoba komufala Nelius Becker, opo a li eshi Hengari ta kufwa ehokololo momafiku 27 Apilili.
Kauta okwa ti, Hengari okwa li a pula oidjemo yoDNA yaye eshi kwa li ta kufwa ehokololo laye, ndee Becker okwe mu lombwela: “Oidjemo yoDNA oya dja mo ndee okaana kake shi koye.” Kauta okwa ti Hengari okwe mu pula opo a tameke eindilo lobooloha meendelelo.
Okwa pula omutamaneki opo e mu pe omukanda wouyelele woshibofa osho sha mangifa po Hengari, netomeno kutya omolwashike epangelo inali hala okuyandja obooloha kuHengari, eekopi domikanda noinima aishe oyo epangelo la hala okulongifa pefimbo loihokolola yobooloha, eekopi dehokololo la yandjwa komutamanekwa nosho yo omahokololo akwao a ningwa kuHengari.
Kauta ota pula yoo vali opo okopi yoidjemo yoDNA oyo i li kopolifi i yandjwe kuye manga otundi 16h00 mEtitatu inai denga.
Hengari okwa li a holoka komhangu yamagestrata mOvenduka noshibofa shokuya ouyuki moshipala Omaandaxa enya adile ko. Oshibofa shaye okwa li sha undulilwa komesho komafiku 03 Juni nokwa li kwa tokolwa kutya na kale modolongo manga.
Hengari ota feekelelwa onghendabala yokufuta ombumbo yoshimaliwa shi fike poN$230 000 komutulimo woshibofa oo te mu lundilile oku mu kwata keenghono.
Oshimaliwa eshi otaku tiwa vati okwa li tashi yandjwa nonghendabala yokuheka nakutula mo oshibofa a kufe mo oshibofa shekwatongonga osho a patululila Hengari odula ya dja ko.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
