Pelesidente waBotswana Mokgweetsi Masisi okwa ti okwa li ve na ondunge yokukufa po eengaba odo di li pokati koilongo ei ivali voo napelesidente Hage Geingob.
Masisi eshi okwe shi popya poshivilo dimbuluko shaGeingob osho kwa li sha ningwa kepengelo laBotswana koGaborone Etitatu.
Pelesidente Nangolo Mbumba novanapangelo vamwe va kula okwa li va holoka poshivilo apa.
“Fye napelesidente Geingob okwa li twa eta po omukalo kutya efiku limwe eengaba odo di li pokati koilongo yetu otadi dulu okukadja po.
“Omwenyo wamumwameme, pelesidente Hage Gottfriend Geingob, nau tulumukwe nombili yaalushe,” Masisi osho a ti ngaho.
Moinima vali imwe ya fimana pokati kaNamibia NaBotswana, oilongo ei ivali oya shaina eudafano lokulongifa oumutwe voshilongo ongeembapila domatalelepo dovakwashiwana voilongo ei komuvelo wedinaTrans-Kalahari/Mamuno muFebuluali odula ya dja ko.
Masisi okwa ti ngee a ifanwa, Botswana ina dopa nande onale okukufa onghatu ndee tava tele Namibia.
“Inandi kumwa eshi kwa li pelesidente Geingob e hole oshilongo eshi. Pefimbo laye li xupi olo a kala kombada yedu, otwa mona Namibia ongakaume koshili kaBotswana,” Osho a ti ngaho.
“Namibia omushiinda muwa napelesidente Geingob mokukalmwenyo kwaye okwa li e na eenghono dokutunga oshilongo eshi, a weda ko ongushu koushiinda, oushiinda oo fye moBotswana itatu xulifa po, naave, pelesidente Mbumba, pefimbo nokonima yefimbo olo hatu lele.
“Botswana, Btswana, okwa ti tangi, shaashi owe tu xwepopaleka mokukuma eenghalamwenyo dovanhu vetu,” Masisi osho a ti ngaho. Mbumba, omanga ta yandje omapandulo aye, okwa ti okudja ashike pemanguluko, Geingob, okwa kala ta longo noudiinini mokuxwepopaleka eenghalamwenyo dOvanamibia.
“Otwa taalelwa koshili kutya pelesidente Geingob okwa longa noudiinini opo a mangulule Namibia nokwa faneka onakwiiwa yokuya komesho yOvanamibia aveshe,” Mbumba osho a ti ngaho.
Okwa ti Geingob okwa fiya Namibia e li monghalo iwa shi dulife eshi a hanga oshilongo shi li eshi a dja kombada.
“Omufimanekwa, pelesidente Masisi, okwa li u na ekwatafano tali dulu okudimbulukiwa noluumwainafana nOmunamibia a pumba, omulelei ou kwa li e lile po oukumwe, elitulemo nokwa li e na oshisho novanhu vakwao,” Mbumba osho a ti ngaho.
EENDJODI DAKULA
Pelesidente okwa ti ongomupopili welongelo kumwe loOvafrika, Masisi naGeingob ove na oinima ihapu ye lifa, ta weda po ta ti ovo vavali okwa li ve na eendjodi dihapu daNamibia naBotswana.
“Omwa tukulula ondjodi ya kula eshi mwa pitika Ovanamibia nOvabotswana va longife oumutwe voshilongo ngee ongaeembapila domatalelepo pokati koilongo ei ivali momafiku 24 Febuluali 2023.
“Oshinima shi li ngaho otashi endelelifa omalandifo oinima nomayakulo, mwa kwatelwa omeendafano ovanhu keengaba,” Mbumba osho a ti ngaho.
Mbumba okwa ti ovanhu nava tape ko nokutyapula ongushu youshiinda muwa noukumwe oo Geingob a kwatela komesho.
“Natu kufe ko oshiholelwa kondjokonona yaye eshi hatu twikile ondjila yokuxwepopaleka onakwiiwa yovanhu vaBotswana naNamibia,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
