‘Geingob na pandulwe sho a talelepo Bix CarWash’

Omupresitente Hage Geingob mOsoondaha okwa holokele ombaadhilila pehala lyomainyanyudho moKatutura mOvenduka lyedhina Bix CarWash, nelalakano lyokuhedha noku uhala pamwe noshigwana molukanda.

Komatango gOsoondaha uuvidio owi ingaana komalungula womupresitente e li poBix CarWash pamwe naakwashigwana mboka ya li po, nokwa li ta popi nayo osho wo okuthanekwa omathano pamwe.
Ashike nando ongaaka,

Nonande yamwe okwa li ye shi nyanyukilwa okukala pamwe nokuyola nomupresitente molwashoka onkalo ndjoka ihayi monika lwaali, opu na yamwe mboka ya nyana Geingob sho a tokola okutalelapo oshigwana momalukanda pondingosho.

Bix CarWas ota adhika molukanda gwaSingle ponto ashike nomatala goSingle Quarter ngoka ga tseyika nawa nokapana.
Oshilyo shongundu yoNudo, ngoka wo a li kansela gwoshikandjohogololo shaKakarara, Vetaruhe Kandorozu, okwa popi kutya etalelopo lyaGeingob itali gandja ethano ewanawa koshigwana.

“Kungame otashi ulike a fa ta hwahwameke okunwa omalovu. Omanga aagundjuka oyendji ye li le po [okunwa omalovu] omolwokwaana etimaumbwile oshoka kaye na iilonga,” osho a popi ngaaka.

Okwa popi kutya ando osha kala nawa ngele omupresitente okwa ningile etokolo lyokutalelapo omatala gaSingle Quarter opo a yambidhidhe nokukumika aanangeshefa mboka ye li mo taya kondjitha oluhepo.

Kandorozu, okwa gwedha po wo kutya omulandu kwa li a longitha monakuziwa ta talelepo iitopolwa ya yooloka okwi iyuvila ko yemwene komashongo gaakwashigwana, okwa li oshinima oshiwanawa.

“Okwa li e na okutsikila noshinima oshiwana shoka kwa li ha ningi shiigongi noshigwana moondolopa dha yooloka. [Peha lyokutalela po Bix CarWash] Okwa li e na okutalelapo omahala goombashu ngaashi olukanda lwaHavana [mOvenduka] nokutala nkene onkalo yaantu yi li,” osho Kandorozu a popi ngaaka.

Omupevipresitente gwongundu yoLPM, Henny Seibeb, megumbo lyopashigwana uunambo okwa pula kutya elalakano netumwalaka ndyoka Geingob a hala okugandja moshigwana olya shike sho a talelepo ehala lyomanwino.
Okwa pula wo kutya etumwalaka lyi li ngiini ta gandja koshigwana.

Ashike nando ongaaka okupitila momikanda gwiikundaneki ngoka gwa pitithwa ohela, omupopiliko gwomupresitente Alfredo Hengari okwa popi kutya inashi pumbiwa iikundaneki noongundu dhoompilameno dhi gandje uusama komupresitente Geingob sho a talelepo oBix CarWash.

Okwa popi kutya omukalo gwa longithwa komuleli gwoshilongo, ogo ehole uuna a hala okuhedha pamwe noshigwana nokupopya naakwashigwana.

Hengari okwa popi kutya okutala aakwashigwana ya nyanyukwa okukala mumwe nomupresitente nokukutha omathano pamwe naye, oshinima tashu ulike nkene e na ekwatathano nokukala a hedha pamwe noshigwana she. “Okugwedha kwaashoka, natu pandule omupresitente Geingob okukala pamwe nAanamibia yoondondo dha yooloka pankalathano. Aanapolitika yoongundu dhoompilameno naya kuthe ko oshiholelwa shoka, niikundaneki nayi shi pandule,” osho Hengari a popi ngaaka.

Okwa popi kutya nonande omupresitente oha kala nomaipyakidhilo, onkene ha ningi onkambadhala yokuthika poshigwana mOvenduka osho wo moondolopa dhopondje yoshilandopangelo.

“Ohayi komahala goositola uuna a zi kongeleka nenge a hinge nokutala mondolopa, mwa kwatelwa wo okutalela po oKatutura, opo a popye nAanamibia ooyakwawo. Naashoka oshinima ehole oku shi ninga,” osho Hengari a popi ngaaka.

Onkalo yaGeingob yokutalelapo oshigwana ombadhilila kayi shi ompe molwashoka monakuziwa okwa li a monika teshi ningi moondolopa ngaashi moSwakopo nomoTsumeb(mOshomeya).

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.