Ehangano olo hali wilike ouyuki wopangeshefa moshilongo ledina Namibian Competition Commission (NaCC) ola tameka okukonakona exwata leengeshefa doRani nomahangano akwao opangeshefa akula molwomikalo inadi yuka vati.
“Omakonakono aa okwa etwa keengeshefa dishona odo da nyenyeta kokomisi kutya omahangano oko hadi lande oinima ohaa tuvikilile exwata leeRani oinima, tee va pula oimaliwa ihapu, taa pula di fute tete doo ihadi kufilwa ko,” omupopiliko woNaCC Dina //Gowases osho a shiivifa Etivali ngaho.
Exwata leengeshefa doRani oli na eefitola onduba konooli yoshilongo.
Omahangano ahamano oo taa konakonwa ongaashi Namib Mills, Bokomo Namibia, Coca-Cola Namibia Bottling Company, Distell Namibia, Namibia Breweries noAnheuser-Busch InBev Namibia.
Eefitola natango oda ti kutya eexwa leeRani ola patulula eefitola dalo popepi neengeshefa davo, osho tashi va fininike va pate eengeshefa davo.
Okomisi otai ka konakona ngee eeRani nomahangano akwao ahamano inaa wanifa po oveta yokukufa ombinga mongeshefa, oyo i li ominge nelongifonai leenghono nomilandu dokupindika dihe li pauyuki.
Ove na omafiku atatu opo va kale va nyamukula kokomisi.
“Ohatu pula yo keshe omukwashiwana e uye kokomisi nouyelele oo e na u na sha nomapopyo aa e li poshitaafula shetu paife,” //Gowases ta ti.
