Ewilikongudu lehangano lokulonga eendjila ledina Roads Contractor Company (RCC) ola kupulashi eelopota doikundaneki domafiku aa kombinga yotendela yomahooli yongushu yomiliyona oshinghwanyu nanho nosho yo okuyandja otendela komalelo opamufyuululwakalo.
RCC okwa ti eelopota edi eenghendabala ashike dokukakeka ondjokonona yomukulunhuwiliki ta vatele Danius Nelumbu.
Momukanda wa tuminwa koikundaneki komunashipundi wewilikongudu Lea Namoloh oshivike sha dja ko, oRCC oya ti kutya okulanda oinima ya fimana ngaashi omahooli omulandu wa pumbiwa kukwashilipalekwe kutya oilonga inai iwa moshipala, ta weda po kutya omapopyo otaa pukifa notaa lalakanene okuteya Nelumbu omukomo.
“Omedina laNelumbu RCC ta dulu okulonga ondjila youle weekilometa 15.5 oyo i li pokati kaSwakopmund- Henties Bay-Uis ina vatelwa nande okomunhu, oproyeka oyo ya kala tai longwa okudja momudo 2014.
Oshinima osho inashi dula okupondolwa kovakulunhuwiliki voRCC vakulu, pakutala kutya Nelumbu okwa ya ashike mombelewa muMarsa 2024,” Osho a ti ngaho.
Namoloh okwa ti, kombinga yewiliko, Nelumbu okwe shi pondola okweeta oRCC nawa kombinga yoSocial Security Commission noNamibia Revenue Agency, oinima oyo ehangano la kala lihe na oule weedula omulongo da pita.
“Okwa hanga eeproyeka detu dimwe tadi hale okweefiwa.
Oto dimbulukwa kutya muApilili 2024, omuyakulwa wetu Road Authority okwa li a yandja omafiku e li 21 koRCC opo i wapaleke oproyeka yokEngoyi-Omuntele ile okondalaka otai kalekwa.
Nelumbu okwa udaneka okuwapaleka nokutwala oilonga pondodo i li xwepo ndee oshinima osho okwe shi ninga ashike manga omafiku oo a pewa inaa pwa ko, ngeno okwa li hasho ngeno oilonga ei oya kalekwa ndee tai yandjwa po kehangano limwe.
Okwa fikama ndee ta longo osho sha pumbiwa,” Osho a ti ngaho.
“Nelumbu natango okwe shi pondola mokukwashilipaleka kutya oimaliwa yomido da pita oya valulwa ndee omikanda tadi yandjwa koministeli yoimaliwa.
Okwa pondola yoo vali okuninga olopota yotete yokomudo moule weedula omuwoi, efindano liwa neenghono. Oinima ei ya tumbulwa apa oimwe yomoinima ihapu oyo a pondola moule wokafimbo kashona,” Osho a ti ngaho.
The Namibian okwa li a lopota omafiku aa kutya omikanda, da nyolwa momafiku 11 Novemba 2024, oda holola nghee omukulunhuwiliki woRCC Nelumbu kwa li a pula ku landwe omahooli meendelelo, ashike omikanda odo okwa li ashike di na eshaino laye.
Omahooli okwa li a landwa kehangano ledina Eco Fuel Investment CC noshimaliwa okwa li sha futwa efiku olo tuu olo Nelumbu a pula omahooli, okwa li a landwa koshimaliwa shi fike pomiliyona imwe oshinghwanyu nhano.
Namoloh okwa ti opu na ovanailonga vamwe ve li ominge naNelumbu.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
