Evava lovanyasha loSwapo ola ninga omatilifo okutaataya oilyo oyo tai twala ongudu komhangu shi na sha noshoongalele shokuhoolola pelesidente wongudu osho inashi ningwa natango.
Ongudu natango inai ninga oshoongalele shokuhoolola pelesidente wongudu okudja ngaa pefyo lapelesidente Hage Geingob momafiku 04 Febuluali.
Eshi kwa li ta popi poshoongalele shevava lovanyasha loSwapo shongudu mutima mOvenduka Olomakaya, hamushangandjai Ephraim Nekongo okwa ti evava otali ka taataya nokufifa ohoni ovo va hala okukufa onghatu yopaveta.
“Otwe va halela ouwa mwaashishe osho tava ka ninga, shaashi ohatu ke va finda, ohatu ke va fifa ohoni, ashike nelelo longudu inali efa odino ei otai twikile […] navo nave va taataye mo moSwapo konima yomhangu,” Nekongo osho a ti ngaho.
Oilyo itano yoSwapo oya twala eindilo layo lokukondjifa etokolo longudu lokuhaninga oshoongalele shokuhoolola pelesidente wongudu konima yefyo laGeingob komhangu yopombada.
Ovanhu vatano ovo ve li mongudu ei tai kondjifa ekoleko laNetumbo Nandi-Ndaitwah lokuninga pelesidente wongudu nota ka kalela po ongudu momahoololo oupelesidente muNovember, ovo Reinhold Shipwikineni, Petrus Shituula, Joshua Martins, Erich Shivute naAina Angula. Shipwikineni Oshoondaxa okwa ti eelopota doikundaneki kombinga yoshinima omo va pula okomisi yomahoololo yaNamibia iha shange Netumbo Nandi-Ndaitwah ongokandidate koupelesidente momahoololo aNovemba kadi shi doshili.
Okwa ti inava pula nande haende wavo opo a yandje omukanda oo tau pula okukufa mo eindilo lavo.
“Oshibofa inatu shi kufa mo fyee noho inatu pula nande haende wetu a ningulule eindilo letu. Paushili, otwa shangela nokuli omukanda umwe kokomisi yomahoololo fyeevene, tau pula eindilo letu li kale li li ngaashi li li,” Shipwikineni osho a ti ngaho.
Nekongo okwa ti eelopota dopaife doikundaneki kombinga yoSwapo otadi lalakanene okweeta omatopauko nengwangwano mongudu.
“Mupya munene, ombuto oyo itai mene. Ombuto yomatopauko nai dope, nai dope. Oikundaneki oya hala okutya otwa topolwa, ashike inatu topolwa.
“Ngee mutu omwa hala okututopola opo tuha ye komesho naNetumbo Nandi-Ndaitwah nongudu yoSwapo, ohoni, osho itashi piti,” Osho a ti ngaho.
Oshoongalele natango osha hoolola eekandidate hamano kongudu yomahoololo aavo tava ka ya momutumba wopashiwana yoSwapo i shiivike nawa ‘The pot’.
Ovanhu ava vahamano otava ka waimina oilyo ikwao yongudu okudja komavava a yooloka ongudu opo i ye momafiyafano oipundi yomopaliamente.
Ovanhu ovo ovo nee Sam Shafiishuna Nujoma, Kristofina Nakanduungile, Albertina Ngavirue, Meryama Nghidipo, Ndjizera Ndjizera naAnselm Marungu.
Mokati kaavo omwa kwatelwa Valmery Jantjies, Berhard Wakudumo naJeremia Nghiwana ovo va kala alushe ve na ehalo lokuhoololwa.
Nekongo okwa pula elelo longudu opo li tale unene kovanyasha.
“Katu li momafiyafano, ashike tu taleni vakwetu,” Osho a ti ngaho.
Natango, oshilyo shongudu mutima yevava lovanyasha loSwapo Willem Amutenya okwa ti oshi li efindano linene eshi evava lovanyasha la tuma eekandidate hamano.
“Osho nashi hambelelwe,” Osho a ti ngaho. Amutenya okwa ti ongudu oya kala tai popile opo ovanyasha va kale alushe va kwatelwa mo mokuninga omatokolo. “Ovanyasha vakwetu ovo tava ka mona omhito yokuya momahoololo okuya meumbo lopashiwana, ohandi pula opo va ye ndee tava ka kwatela komesho eenghendabala dokuyambula po eliko nonghalafano yovanyasha vakwao. Ovanhu ve pupi letu ove na elineekelo lakola, onghee nee natu ke litule mo moinima ya pamba ovanyasha.”Omundjadjukununi woikwapolitika Nduba Kamwanyah okwa ti ehoololo loipala ipe mevava lovanyasha otali eta omalipulo kombinga yoikumungu yomeni longudu.
“Omanga ovanhu ava vehe shiivike mopolitika, eemhito davo dokudja momusholondodo omo ode likolelela unene kopolitika yomeni longudu,” Osho a ti ngaho. Okwa ti oshinima eshi shoipala ipe ya hoololwa otashi ulike omalunduluko nosho yo eenghendaba deengudu dimwe dokulundulula onghalo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
