Ehangano lEpupa Investment Technology ola twala oministili yoshimaliwa komhangu, tali ti otendela yokutukula eependjela oyo ya pewa NamPost oya fa ihe li paveta nopauyelele.
Momikanda odo da yandjwa komhangu yopombada Etitatu, ehangano ola ti omulandu ou wa longifwa kakwa li wopauyelele nokwa pe hadi “oinima inai yela mokati komahangano epangelo”.
NamPost ota ka tameka nokuyandja opendjela mEtine tali ta kOkahandja nokOmitara peembelewa davo, nosho yo koGroot Aub nOtjimbingwe.
Epupa ola hala etokolo lomhangu meendelelo kombinga yoshikumungu eshi, tali ti oihokolola itai ka yandja nande oufemba kehangano e li li twikile mangha.
Ehangano ola ti oshikumungu eshi nashi twalwe komhangu ya shiya ko, otendela yomido nhano otai ka twikila ashike nande oshikumungu oshi li momhangu.
Pefimbo olo Epupa otali ka kanifa oilonga yalo ndee tali pate, ehangano osho la ti ngaho.
Epupa ola ti ehangano olo hali wilike eetendela moshilongo ledina Central Procurement Board of Namibia (CPBN) ola lombwela oministili yoshimaliwa i longekide omikanda dokukufa ombinga motendela ipe, olo oministili yoshimaliwa ya ekelashi, tai likolele momulandu welombwelo.
“Momukanda wenyamukulo woministili yoshimaliwa oya popya kutya omulandu wokukufa ombinga motendela omu okwa li wa kalekwa.
Onghee nee oministili okwa li ya manguluka okutameka nelunduluko eli ngaashi ya lombwelwa kupresidente muMarsa 2025 konima
omulandu wokukufa ombinga motendela omu wa kalekwa,” omukanda osho wa ti ngaho.
Epupa ola ti oministili itai dulu okukala ye likolelela metokolo lomulandu tai ti otendela nai pewe NamPost, ashike oya pumbwa oku liufa koveta.
Epupa ola ti okwa li la anyenwa omhito oyo li na oufemba li kufe ombinga motendela omu.
“Epupa otali dulu, oli na owino mokulonga otendela , notali dulu okudenga mo NamPost momafiyafano oo kwa li a pumbwa okulandula omilandu dokukonga oipumbiwa yepangelo,” ehangano osho la ti ngaho.
Ola ti kutya oministili okwa li nale i shii kutya otendela yokutopola eependjela otai pewa lyelye mangha omilandu adishe dokukonga oipumbiwa yepangelo inadi ningwa, tali weda po kutya NamPost okwa li a lombwelwa a yandje eindilo laye muJuni.
Ehangano lokuwilika eetendela depangelo moNamibia ola ti ola fimaneka oinima aishe ya pumbiwa mekongo loipumbiwa yepangelo, nola pula oministili yoshimaliwa i yandje ouyelele wokomwedi kulo, tau holola kutya opwa ningwa shike noinyangadalwa oi li pondodo ilipipo momafiku 19 Juni.
CPBN okwa ti oministili okwa li ya pula i wedelwe ko efimbo, olo kwa li la yandjwa nokwa li yoo ya pumbwa i longekide nokuyandja omafaneko okukonga oipumbiwa yepangelo omahangano aa nosho yoo omikanda domilandu dokukufa ombinga motendela omu mangha omafiku 30 Seotemba inaa koya.
Omukandaano owa ti CPBN momafiku 20 June okwa li a wedela omafiku ndee ta yandje omalombwelo, ashike oministili momafiku 24 Juni oya pula oshinima eshi shiha landulwe tai longifa okatukulwa 34 kokatendo kokukonga oipumbiwa yepangelo.
Okatukulwa aka oka pitika ehangano lepangelo olo tali dulu li longe oilonga.
Epupa ola ti oshinima osho tashi popiwa osha pitika ashike shi ningwe ngee otendela i na ongushu yoshimaliwa tashi tengenekwa shi fike peemiliyona N$120, omangha otendela ei tai popiwa oi na oshimaliwa shi fike poN$273 550 000.
Ehangano ola ti oministili oya koyelela omilandu doshinima eshi ndee tai yandje po otendela koNamPost yomido nhano.
NamPost okwa ti sha landula oshinima eshi okwa li a pulwa a yandje omikanda daye adishe da pumbiwa ndee ta holola elilongekido laye ongehangano lepangelo a kufe ko okuyandja ependjela.
Pefimbo loministili ya shiivif kutya NamPost oye ta ka topola eependjela, oya ti epangelo otali ka xupifa oshimaliwa shi fike peemiliyona N$54 kodula.
Ominsitili yoshimaliwa oya ti epangelo ola kala nokulongifa oshimaliwa shi fike peemiliyona N$120 kodula li fute omahangano opaumwene a wilike nokutukula eependjela oshilongo ashishe.
