Epangelo otali pulwa opo li fute ovakwapata veembila odo di li koShark Island

Omuleli wongudu yoPopular Democratic Movement McHenry Venaani okwa ti epangelo nali fute ovakwapata ovo ve na eembila di li koShark Island, konhele oko oproyeka yogreen hydrogen ya tengenekwa i ka kale.

Okwa pulwa opo ku talwe nawa kombinga yoiyemo yo proyeka yogreen hydrogen nofuto yovakwapata vaavo kwa li va dipawa momadipao a nghi na nghenda nokwa li va fudikwa ponhele oyo kwa li inai tulwa omadidiliko momudo 1904.

Oshinima eshi osha landula oshinyolwa osho sha li moThe Guardian oshivike sha dja ko, tashi lopota kutya ehangano lokuninga omapekapeko oshali, Forensic Architecture, ola mona eenhele opo kwa li hapu ningilwa omadipao, hapa longifwa ovanhu keenghono, hapu idililwa ovanhu meedolongo nokulongela ovanhu ominyonena dopaixulo oinima oyo kwa li hai ningwa eshi kwa li okanunu haka longifwa kOvagerman pokati komodo 1905 no1907.

Ovaherero ve dulife po65 000 nOvanama ve li 10 000 okwa li va dipawa ketanga laGerman. Eponhokelo eli okwa li la holoka eshi Samuel Maharero kwa li ta kondjifa okulwifa eemhango doukoloni.

Vahapu okwa li va dipayelwa meni leekamba davo odo da li pokanhunu opo paife pakondekwa komeva.

“Otu na okutala keembinga adishe, komauwa eliko loshilongo nokoukwashili wondjokonona, ngee ova hala okulundulula eembila odo inadi tulwa omadidiliko ove na okufuta ovakwapata. Ei onhele oyo ya ningilwa omadipao a nghi na nghenda, onghee nee ove na okufatulula kutya oshike sha ningwa po opo kwaamenwe eenhele odo,” Venaani osho a lombwela oThe Namibian ngaho Etivali.

Natango oshilyo shimwe shongudu yoUnited Democratic Front, Dudu Murorua, osha holola omaliudo a ye kombinga yetuliloshikepa olo tali ningwa lakula, shaashi otali ka vikilila onhele ya fimana yondjokonona ya fimana yoShark Island.

“Okanhunu inaka kuma ashike Ovaherero nOvanama, onhele oyo ya pumbwa okushangwa mondjokonona yaNamibia. Onhele tai dimbulukifa ondjokonona,” Murorua osho a ti ngaho Etivali.

“Nghi wete kutya oshike ehangano loNamibian Ports Authority (Namport) tali i fiyo oponghatu yokudima po ondjokonona yoshiwana shaNamibia.”

Omundjadjukununi woikwapolotika Ndumba Kamwanyah, okwa ti oShark Island onhele yefimano oyo i na ondjokonona ya fimana, unene ngaa kovakwapata viihakanwa yomadipao a nghi na nghenda.

Okutala koshinima shi li ngaha, onhele yopamufyuululwakalo, ndee oya pumbwa okuungaungwa nayo noukeka, mwa kwatelwa okuninga omapulaapulo novakwapata voonakuningwa oihakanwa yomadipao a nghi na nghenda, osho a ti ngaho Etivali.

“Eliko inali kala lidulife oinima yomufyuululwakalo nefimano lonhele oyo. Otashi udifa nai eshi onhele oyo ihadi ondjokonona otai da nenwa.”

Kamwanyah okwa ti okwa li kwa ka nifwa eemwenyo dihapu, onghee nee oinima ya pamba eliko nai ningwe ngaa konima kwa ningilwa ovakwapata voonakuningwa oihakanwa omapulaapulo.