Epangelo otali pulwa li tote opendjela yovanhu ovo vehe na oilonga

Eumbo Etivali lopashiwana ola pula opo kutotwe opendjela yOvanamibia ovo vehe na oilonga ve li pokati keedula 18 fiyo 59, sha landula omapekapeko kombinga yoshimaliwa osho sha pulwa shi kale ngeno tashi pewa ovanhu ovo ihava longo keshe komwedi va dule okulixupifa.

Okomitiye yopalimente i na sha noundjolowele, onghalonawa yopanghalafano noipambele yoilonga oya pula epangelo li wedele eependjela li kwatela mo ovakwashiwana, ovo ihava mono omauwa eependjela paife.

Oshinima eshi osha dja molopota yokomitiye i na ouyelele kombinga yomauwa oshimaliwa osho hashi pewa ovanhu ovo ihava longo keshe omwedi yoshiwana shokOtjivero-Omitara moshitopolwahoololo shaMaheke.

Okomitiye okwa li ya pitikwa keumbo etivali lopashiwana konima ya yandja ouyelele tau popi kombinga yefimano lokutameka okuyandja oshimaliwa kovanhu ovo vehe na oiyemo notava mono oixuna monamibia.

Omupedu nashipundi wokomitiye, Emma Muteka, oye kwa li a yandja ouyelele wolopota ei pefimbo lomutumba weumbo etivali lopashiwana Etine.

Okwa ti omakonakono okwa mona kutya etoto loshikefa shokuyandja oshimaliwa kovanhu ovo ihava longo ola xwepopeka eenghalo domaxupilo dovanhu ovo kwa li va tala ashike meependjela dovakulupe nounona.

“Oinyangadalwa yomaxupilo koitopolwa oyo ivali oya ya pombada, ovanhu vamwe ovo hava mono omauwa aa ova tula oiyemo yavo kumwe ndee tava tungu eebashu navamwe ove shi pondola okushunifa ounona vavo keefikola. Vamwe ova tameka eengeshefa davo dishona ngaashi okuninga eedopi, okulandifa omahaisha, okuninga eemboloto nokuwapaleka eenghaku, oinima oyo ya xwepopaleka omaxupilo avo,” Osho a ti ngaho.

Momudo 2005, ehengumukilomumwe lomahangano ehe shi epangelo okwa li la pula ku totwe opolohalama yokuyandja oshimaliwa keshe komwedi kovanhu ava ihava longo voo inava fika okukwata opendjela yovakulupe, oyo tai lalakanene okuyandja efele kukeshe Omunamibia komwedi.

Oproyeka ei okwa li ya ningilwa omalolelo kOtjivero-Omitara okudja muJanuali 2008 fiyo Desemba 2009, novanhu ve li 1 000 okwa li tava mono omauwa aa. Muteka okwa ti okomitiye oya mona kutya Namibia oku na eepolohalama dihapu dokuyandja omayakulo opanghalafano ashike inadi hanga nawa oshiwana ashishe opo di dule okuvatela omwaalu wovanhu oo wa halika.

Namibia oku na eepolohalama dihapu deependjela, mwa kwatelwa opendjela yovakulupe, opendjela yoilema nosho yo opendjela younona oukwanaluhepo.

Eepolohalama dikwao omwa kwatelwa opolohalama yokutelekela ounona peefikola nosho yo oshikukuta.

Epangelo ola lundululila yoo vali okuyandja oikulya mopendjela yoshimaliwa shi fike poN$600 komwedi yovanhu ovo tava mono oixuna, Muteka osho a ti ngaho.

“Ohatu pandula epangelo molweepolohalama da yooloka dokuvatela ovanhu pamaxupilo odo di li po, ashike nee, otwa mona kutya kapu nande opolohalama ya tana ovanhu ovo tava mono oixuna ve li pokati komido 19 fiyo 59, shapo ongeenge omunhu oo oshingudu,” Osho a ti ngaho.

Okomitiye oya pula epangelo opo li lihongele kosystema yeependjela yaSouth Africa naBotswana.

Muteka okwa ti South Africa oha yandje oshimaliwa kovanhu ovo vehe na oilonga ve na eedula okudja po18 fiyo 59 ovo inava kwatelwa mopolohalama yeependjela.

Pakuweda keependjela, Botswana oku na oshikefa shomayambulepo ovanyasha osho hashi yandje omayambidido kovanyasha ovo vehe na oilonga okudja peedula 18 fi yo 35 paku va pa oshimaliwa sheeproyeka dokweeta oiyemo.

Oshikefa eshi ohashi yandje eepelesenda di li 50 domikuli neepelesenda di li 50 ohashi yambidida nohashi vatele yoo natango ovakwashiwana ovo ve na oiyemo inai koya poN$3 422 komwedi.

– NAMPA

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.