Ovawiliki vomamaliko ovatamanekwa moshipofa shoFishrot ovo va ulikwa kepangelo ova taalela omikundu dihapu dopaveta eshi tava kendabala okukufa ko nokuwilika omaliko ovatamanekwa moshipofa omu meni nokondje yoshilongo.
Ovawiliki vomaliko ava natango ova nyematekwa keembaanga domoshilongo itadi nyamukula doo itadi ningi oyoongalele novatamanekwa.
Momapulaapulo noThe Namibian muFebuluali, Harald Hecht, umwe womwaavo va ulikwa kepangelo va file omaliko ovatamanekwa oshisho, okwa ti otava nye gwa okukufa ko omaliko oo e li kondje yoshilongo shaashi elombwelo lomhangu olo la yandjwa momudo 2020 ola tumbula ashike omaliko oo e li meni loshilongo.
“Opu na elombwelo lomhangu la ningwa muFebuluali kweetwe omaliko oo e li kondje yoshilongo moNamibia, ngee ohandi dulu oku shi ufana ngaho,” osho a ti ngaho.
Momudo 2020 oThe Namibian okwa li ya lopota kutya ovatamanekwa moshipofa shoFishrot ove na omaliko kondje yoshilongo, mwakwatelwa omaumbo ondilo moCape Town, Dubai, England noSpain.
Omaliko aa ahapu oomukulunhuwiliki mukulu woInvestec Asset Management Namibia, James Hatuikulipi – umwe womovatamanekwa moshipofa osho sha kala nokukatekwa okudja momudo 2019.
Omakateko aa otaa etwa unene komaindilo okomhangu taa ningwa komutamanekwa umwe, minista mukulu wouyuki Sacky Shanghala.
Ovatamanekwa vakwao ovo minista mukulu weeshi Bernhard Esau, oshitenya shaye Tamson Hatuikulipi, omukulunhuwiliki mukulu woFishcor Mike Nghipunya, Pius Mwatelulo naRicardo Gustavo.
Otava tamanekelwa okukala va kwatelwa mo moshipofa shoFishrot shoulingilingi noimaliwa ihe na eedjo da yela sha kwatela mo eemiliyona di li N$317.
Omwedi wa dja ko, ovawiliki vomaliko avo ova holola kutya inava popya novatamanekwa oule weemwedi 18.
Nande ova taalela omikundu, Hecht okwa ti okwa li e na omukumo kutya eyokomesho otali ningwa neudo shaashi ovawiliki vomaliko aa paife ova tala mokuninga omusholondodo womaliko aeshe ovatamanekwa.
“Oshinima sha kula lela, ashike otu na omukumo kutya ohatu ka ya komesho nawa neudo,” osho a ti ngaho.
Ovawiliki vomaliko ova ti ova shakeneka omikundu de lifa naado kwa li da shakenekwa kovatonateli vomaliko vakulu David Bruni naIan McLaren.
“Omikundu oda kwatela mo omakwatafano, eefuto, okumona oufemba wa pumbiwa tu ninge omatokolo, nokukundafana novatamanekwa,” Hecht ta ti.
Momudo 2020, omhangu okwa li ya yandja elombwelo omaliko aeshe a ye momake epangelo “meendelelo”, mwa kwatelwa omavalulilo eembaanga nomaliko aeshe ovatamanekwa.
Elombwelo lomhangu lokutula omaliko momake epangelo la yandjwa momudo 2020 ola holola kutya ovatamanekwa moFishrot ove na omahangano e li 22, omaliko ihaa tembulwa e li 36, omavalulilo eembaanga e li 36 nomatuwa e li 134.
She likolelela kolopota yovatonateli vomaliko, omatuwa natango ee li momake okomisi yokulwifa oimbuluma okudja ngaa nghee a kwatelwe ko.
“Keshe omumunhu e na eshiivo lomaliko aa ota kelelwa aha ungaunga nande nomaliko ovatamanekwa kakele ashike ngee okwa pitikwa ile a pulwa e shi ninge komhangu,” olopota tai ti.
Ashike nee, eelopota mbali dovatonateli vomaliko aa oda ti kutya inava kala nande nokumona eyambidido va longe oilonga yavo, osho tashi koleke omapopyo aHecht.
Omhangu yopombada oya ulika Hecht naKnoetze momudo 2024 va konge nokuwilika omaliko a kwatakanifwa noFishrot konima Bruni naMcLaren va fiya po oilonga ei.
Aveshe okwa li ve na omikundu de lifa: elongelokumwe la nghundipala, ouyelele uhe po, omanyamukulo okudja komahangano a enda kashona nomangabeko opaveta kombinga yomaliko oo e li kondje yoshilongo.
Olopota yaxuuninwa, ya shangwa momafiku 18 Febuluali 2025, oya yandja ouyelele kombinga yomikundu odo va taalela, mwa kwatelwa elongelokumwe la nghundipala okudja keembanga nopolifi.
“Omanyamukulo okudja komahangano oiniwe naakwao a yandje omauyelele nao inaa wana nawa.
Oshihopaenenwa, otwa kala twa teelela eeemwedi di dulife pumbali paife opo ombaanga yeengeshefa yaNamibia i yandje ouyelele kombinga yomavalulilo eembaanga da yooloka,” olopota osho ya ti ngaho.
“Ovakufimbinga vehe wetike natango ove li omukundu wakula, oyoongalele tai kalekwa luhapu nomanyamukulo okudja komahangano oiniwe, nomanyamukulo amwe inaa yandjwa natango nokuli konima yeemwedi mbali.”
Ovatamanekwa ovo ve na omaliko aa omwa kwatelwa James Hatuikulipi, Gustavo, Tamson, Shanghala, Esau naMwatelulo.
Oyoongalele itano naGustavo, Hatuikulipi naMwatelulo kwa li i na okuningwa inai ningwa pokati kaSeptemba naNovemba 2024 molwoikumungu yeameno ya kwatela mo odolongo yevyulonghalo nopolifi pefimbo lolopota.
Ovawiliki vomaliko ova ti okwa li va yandja enyenyeto eli komupedu komisina Veikko Armas.
Shalandula eenghundafana nopolifi novanambelewa vodolongo yevyulonghalo muFebuluali, ova udafana kutya oyoongalele tai landula otai ka unganekwa kombelewa yomutamanekindjai.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
