Oministeli yoilonga noyeendifo oya faneka okulonga eepate oombali moshilongo ashishe opo i xwepopeke oiponga okweenda kwoyeendifo noinyangadalwa yopaliko.
Epangelo ola faneka okulonga eepate mbali pokati koUsakos noArandis neudo ongombinga ya kula yeenghendabala dokuxwepopeka eameno lomeepate odo hadi ningilwa unene oiponga.
Minista woilonga noyeendifo Veikko Nekundi onghela okwa koleka oshinima eshi, ta ti oministeli otai tale tete keepate odo hadi kala di hadi oyeendifo nohadi ningilwa oiponga luhapu.
“Ohatu tameke nopate yopokati koUsakos noArandis neudo.
Pakuwedela kwaayo yopokati koWindoek nOkahandja, otwe lipyakidila yoo noSwakopmund noWalvis Bay,” osho a ti ngaho.
Omwedi wa dja ko, Nekundi okwa shiivifa kutya epangelo ola yandja eemiliona di li lwopoN$200 keepolohalama di na sha neameno lomeepate momudo woshimaliwa 2026/27.
Omwaalu ou inau kwatela mo odo tadi longwa koshi yoRoads Authority notashi ka nghonopeka oungoba, oikonga yomalongo neameno lomeepate.
Ehangano lokuungaunga noiponga yomeepate ledina Motor Vehicle Accident Fund, ola shanga omukanda momafiku 30 Apiilili, tau ti oshilongo osha didilika oiponga yomeepate i li 921, ovanhu ve li 1 467 ova lemana manga ve li 143 va xulifa pokati kaJanuali nomafiku 26 Apiilili neudo.
Pokati kaJanuali naOktoba 2025, oshilonga osha didilika oiponga i dulife po2 600, omafyo e li 414 nomalemano omayovi.
Omukulunhuwiliki mukulu woRoad Authority, Conrad Lutombi okwa ti pefimbo a li mombelewa, okwa pula ku longwe eepate mbali pokati kOkahandja nOtjiwarongo fiyo okOmuthiya shaashi opate oyo ohai ende omatuwa ahapu.
Lutombi okwa ti nghee pokati kOkahandja noWindhoek pwa ningilwe eepate mbali ita dimbuluka pa ningilwa oshiponga.
“Keshe onghendabala tai ningwa koshilongo shi xupife eemwenyo oi shii okulandulwa.
Ohandi popile lela opate pokati kOkahandja nOtjiwarongo, Otavi fiyo Omuthiya i nenepekwe, shaashi eepate edi ohadi kala di hadi keshe efimbo neemwenyo dihapu omo da kanena meepate edi,” osho a ti ngaho.
