Epangelo otali faneke okukufapo ovanailonga vakulu voWalu

Epangelo ola faneka li kufe po ovanailonga ve li 222, ovo eekondalaka davo doilonga kwa li da xulifwa po omafiku aa kehangano ledina Walu Fishing, okupitila momaudafano nomahangano e li anhe okukwata eeshi koshi yopolohalama yepangelo yoGovernment Employment Redress.

Ehangano keshe otali ka pewa eequota delikolelela komwaalu wovanailonga.

Oshinima eshi oshi li ombinga yeenghendabala depangelo dokuungaunga nomikundu doipambele yoilonga manga tali xwaxwameke etoto loilonga moshikondo shokukwata eeshi.

Eenghundafana domafiku aa kwa li da ningwa nomahangano okukwata eeshi novanailonga tava kufa ombinga mopolohalama kOmbaye, minista wounamapya nounaimuna, eeshi, omeva nomatendululo omadu Inge Zaamwani-Kamwi naminista wouyuki noipambele yoilonga Wise Immanuel okwa li va tala kokutula po omaudafano oo taa ka wilika oilonga ei koshi yosystema yokuyandja eequota ya talululwa, okuya komesho.

Eshi kwa li ta popi kombinga yeenghundafana, Zaamwani-Kamwi okwa ti eenghundafana okwa li da nuninwa okukwashilipaleka kutya ovayandji voilonga novanailonga ova uda ko nawa oinakunifa yavo manga omaudafano ape inaa shainwa.

“Otwa kala hatu kundafana twa mana mo novayandji voilonga novanailonga tu kwashilipaleke kutya manga inatu ya meudafano koshi yosystema yokukwata eeshi, keshe umwe oku udite ko nawa oshinakuwanifa shaye, unene ngaa ovanailonga kombinga yomilandu nomalandulafano oilonga yavo,” osho a ti ngaho.

Minista okwa fatulula kutya eeministili novayandji voilonga ova talulula osho sha dja moshikako shokukwata eeshi sha pita ndee tava yeleke nghee ovanailonga vape tava ka tulwa moilonga.

“Oshikumungu shimwe osho kwa li twa hala okupopya eudeko mokati kovanailonga vamwe ovo va itavela kutya shaashi ovayuli veeshi itava dulu okulonga meefakitoli.

Okwa li twa pumbwa okuyeleka nawa kutya otava ka tulwa lela peni,” Zaamwani-Kamwi ta ti.

Ovanailonga navo okwa li yoo va pewa omhito va popye omaupyakadi avo naasho ve lineekela, konima eembinga adishe mbali okwa li da etwa pamwe di udafane manga eekondalaka inadi manifwa.

Zaamwani-Kamwi okwa yeleka kutya omahangano aa pulwa a yandje eekondalaka dovanailonga da shainwa moshivike tashi ya, osho tashi ka pitika nee epangelo li shaine omaudafanotwokumwe ndee tali pitifa eequota.

Natango, Immanuel okwa londwela omahangano a yande oinima inai yela yopailonga, ta indile ovayandji voilonga va kundafane nawa novanailonga manga inava xulifa po eekondalaka davo.

Okwa dimbulukifa yoo ovanailonga va ude ko nawa oinakuwanifwa yavo oyo ya tumbulwa meekondalaka davo manga inave di shaina.
-NAMPA

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.