Epangelo laNamibia ola longifa eemiliyona di li lwopoN$730 mehangano lonyama laNamibia ledina Meat Corporation of Namibia (Meatco) moule weedula nhee da pita, omo oshimaliwa shihapu sha longifwa okufuta eengunga dehangano.
Ehangano ledina Foster Digital Education ola ti, eepelesenda di li 71, di fike peemiliyona di li N$519, okwa li sha longifwa okufuta omikuli, omanga eepelesenda di li 29, ile eemiliyona N$211, kwa li oshimaliwa sha yandjwa okuyambidida oilonga yaMeatco.
“Eemiliyona di li N$519 oda futa omikuli mbali odo kwa li da kufwa kuMeatco kombaanga yomayambulepo nokwa li nee da futwa kepangelo momudo 2024,” Omundjadjukununi woimaliwa Fimanekeni Mbodo osho a ti ngaho.
Ehangano lepangelo lokulonga onyama ola kala la taalela oupyakadi wopashimaliwa eedula edi, unene ngaa shaashi eengobe dokutoma oda kala tadi ningi dishona noiyemo otai ningi ishona.
Pokati komudo 2020 no2022, omwaalu weengobe daMeatco dokutoma owa li wa wa edu fiyo opeepelesenda 68, omanga oiyemo ya shuna pedu fiyo opeepelesenda 58.
Momudo 2024 okwa li ngaa a fa te ya xwepo omo a toma eengobe di li 65 427, odo da eta oiyemo i fike pobiliyona imwe oshinghwanyu mbali.
Oshinima eshi osha holola eyopombada okudja peengobe di li 38 075 odo kwa li da tomwa momudo 2023 nokwa li da eta oiyemo yeemiliyona di li N$765, Mbodo osho a ti ngaho.
Okwa ti kutya momudo 2020 eemwalu odo inadi monika nale dashuna pedu okwa li da etwa konghalo yoshikukuta oyo kwa li ya fininika ovanafaalama va kale vehe na oimuna ya wana.
“Omwaalu u li pombada wekano momudo 2020 okwa li wa etwa konghalo yoshikukuta ya nyaika oyo kwa li ya fininika ovanafaalama va kale vehe na oimuna ya wana, osho kwa li sha kuma neenghono omwaalu weengobe noiyemo,” Mbodo osho a ti ngaho.
Nande onghalo oya alukila kouwa, Meatco okwa twikila nokukana eedula edi. Momudo 2022 okwa li ashike a mona oiyemo yeemiliyona N$205, omangakwa li inai shuna vali pedu fiyo opeemiliyona N$68 momudo 2024.
Okwa ti elongifo loimaliwa lehangano, ola twikila nokutula moudjuu oimaliwa yalo.
Ovanailonga noilandomwa oyo kwa li ya monika kutya otai longifa oimaliwa ihapu neenghono osho a ti ngaho, oipumbiwa oyo aike momudo 2020 okwa li ya ya pombada neepelesenda 34 okudja peemiliyona 61 okuya peemiliyona N$82 momudo 2024.
“”Pefimbo opo oimaliwa oyo hai longifwa movanailonga, kakwa li naana ye linyenga oya kala ngaashi i li,” Mbodo osho a ti ngaho. Eengunga nado oda ninga dihapu moMeatco.
Momudo 2023 eepelesenda di li 92 doshimaliwa okwa li da longifwa moinima oyo ihe na oiyemo tai kufa po ashike ndee itai eta po omanga kwa li inadi shuna pedu peepelesenda di li 67 momudo 2024.
“Eliko laMeatco alishe nalo ola kala nokushuna pedu efimbo molwokuhaninga oiyemo kwa shikulafana. Eyopombada leliko olo la monika momudo 2024 ola etwa koimaliwa oyo ya dja kepangelo nokufuta omikuli,” Mbodo sho a ti ngaho.
Okulandifa kondje yoshilongo okwa fimana unene koiyemo yehangano eli, shaashi okulandifa kwopaunyuni okwa eta eepelesenda di li 79 doiyemo momudo 2024.
“Eepelesenda di li 42 doiyemo ohadi di koEuropean Union, kwa landula Norway neepelesenda 17 naSouth Africa neepelesenda 8,” Mbodo osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
