Epangelo ola longifa eemiliyona N$30 mokutwala Nujoma koitopolwa ya yooloka moshilongo

Epangelo ola longifa oshimaliwa shi fike peemiliyona N$30 moinima ya pamba okutwala olutu lomukokoli presidente Sam Nujoma koitopolwahoololo ya yooloka moshilongo.

Eshi osha kwatela mo omiliyona imwe keshe yolweendo keshe lodila yeatanga leameno.

Nujoma okwa xulifila mOvenduka momafiku 08 Febuluali.

Ongudu yovakwaita ve li lwopo5 000 okwa li ya unganekwa opo i kwatela komesho oituvi dimbuluko nefudiko lopapangelo, olo la xula nepako laye komaendo omapendafule mOvenduka Olomakaya.

Epangelo kakwa li naana la yandja ouyelele kutya omangudumano efudiko laNujoma otaa pula oshimaliwa shi fike peni.

Oikundaneki oya kala nokutula kumwe eemwalu da tengenekwa, mwa kwatelwa oimaliwa i fike poN$500 000 oyo epangelo la yandja keshe koshitopolwahoololo.

Eshi osha ninga oshimaliwa eshi shi kale shi fike peemiliyona heyali.

Ashike nee, odjo oyo i li popepi noshikumungu eshi oya tengeneka kutya oshimaliwa osho sha longifwa mokutwala olutu laNujoma koitopolwahoololo, mwa kwatelwa noyeendifo, oivilo noimaliwa yoinima ikwao, otai hange peemiliyona N$30.

Eemiliyona dimwe oda longifwa moyeendifo yovakwaita nomahooli, eemota nosho yo oyeendifo yovanambelewa vepangelo oyo kwa li ya findikila omudimba.

Oimaliwa natango oya longifwa momahooli eedila nomadakadaka ovakwaita.

Odila yetanga leameno laNamibia yedina Shaanxi Y-9E, oyo kwa li ya umbata olutu laNujoma, otai dulu okupula epangelo oshimaliwa shi fike pomiliyona imwe shomahooli keshe molweendo, osho tashi ka eta omwaalu u kale u fike peemiliyona N$8.

Oministeli yetanga leameno noipambele yoonakulwa vakulu nande ongaho, oyaanya kutya oshimaliwa itashi hange keemiliyona N$30.

Ashike omukulunhuwiliki wetanga leameno noipambele yoonakulwa vakulu Wilhelmine Shivute inaa nya nande kutya epangelo ola futa oshimaliwa shi fike pomiliyona keshe molweendo lodila yovakwaita.

Okwa ti elongifo lodila yetanga leameno ya longwa koChina nokwa li ye ya odula ya dja ko, olo ashike kwa li li na ombilixa.

“Pakutala kutya ei odila yetu, ehoololo lokwiilongifa okwa li la talika ko kutya olo li na ombilixa kashona kepangelo, shaashi etanga leameno oli na oshinakuwanifa shokulongekida nokukwatela komesho omafudiko epangelo,” Osho kwa li a popya oshivike shinya.

Namibia oye ashike oshilongo shotete kakele kuChina ta longifa odila ei.

Odila ei oye ya yoo nomayakulo amwe a wedwa po ngaashi okwiiwapaleka nosho yo ovashingi.

Pakuweda po, ovashingidila vetanga leameno, nosho yo ovanambelewa veameno ovo kwa li va enda pamwe nomudimba okwa li yoo va kwatelwa mo moshimaliwa omo.

Oministeli yetanga leamneo oya itavela kutya omafudiko epangelo oku na ondilo, ashike inai holola nande kutya oshimaliwa shi fike peni sha longifwa fiyo opapa.

“Keshe oshinima tashi pula oshimaliwa shopatanga leameno osha tulwa momutengenekwafaneko nosha futwa koministeli yeatanga leameno noipambele yoonakulwa vakulu,” Shivute osho a ti ngaho.

ANGOLA OKWA PULA A VATELE
Okuumbata omudimba wanakufya presidente okwa li taku kundafanwa odula ya dja ko, sha landula efyo lapresidente mukulu Hage Geingob muFebuluali.

Pefimbo opo, Angola okwa li vati a pula opo a vatele noyeendifo yoshilongo yopakwaita, ashike epangelo laNamibia okwa li le shi anya pefimbo opo.

Etokolo eli okwa li la ningwa, nokwa itaveliwa kutya, ola ningwa opo kuhanyanwe omumbwe yeedila detanga leameno moNamibia oyo ya li po pefimbo opo.

Etanga leameno okwa li la mona eedila mbali doShaanxi Y-9E kongushu yobiliyona keshe imwe muDesemba, osho sha eta opo olutu lomukokoli presidente waNamibia li dule okutwalwa koitopolwahoololo iheyali moshilongo.

Nande ongeshefa ei okwa li ya manifwa petameko lomudo 2023. Eedila okwa li ashike da etwa odula ya dja ko, oikundaeki osho ya lopota ngaho.
Odila ei yoShaanxi Y-9E oye ya novashingi ve li vavali okudja koChina.

Omupopiliko woministeli yeatanga leameno Petrus Shilumbu okwa popila ovashingidila ava, ashike okwa ti kutya odila okwa li tai tukifwa kovanhu vomoshilongo.

“Odila kaishi okaDankie Botswana (Toyota Corolla) aka to dulu ashike okulanda nena ndee mongula oto shingi nale ove ou ka shi nale meni.
“Eshi oshinma shi na ondilo sha pula eemiliyona dovafuti voishoshela yepangelo,” Osho a ti ngaho.

Shilumbu okwa ti odila okwa li tai tukifwa kovanhu ovo va dja koChina nokOvanamibia.

Ovashingidila vaNamibia ovo kwa li va kwatelwa mo ovo kakukutu komatanga Alfeus Shalimba naDavid Ndeshaanya.
“Fiyo opa otava longo nawa.

Ava ovashingidila ovo va kala metanga leameno oule wefimbo. Ova tukifa eedila da yooloka. Ashike nee, kombinga yodila ei, ovaninga eemwedi di li hamano tava mono omadeulo koChina.

“Ashike osho inashi wana. Mokutukifa eedila, osha yooloka. Oho lande ashike odila nena ndee to tukifa u ye? Owa pumbwa okuvatelwa,” Shilumbu osho a ti ngaho.

“Ovaashingidila ovo ove lile po okutala ngee ovashingidila vetu otava ningi ngaa oinima i li mondjila.

Otava tukifa ngaa odila ngaashi ve na okwiitukifa? Otava landula ngaa omilandu? Otava wanifa po ngaa omilandu deameno?”

Oministeli yetanga leameno okwa li ya pewa omutengenekwafaneko woshimaliwa shi fike peebiliyona N$6.3 omo eepelesenda 67 di li doininwe yovanailonga.

Eepelesenda 21 oda ya moipumbiwa nomomayakulo akwao, eepelesenda di li 12 okwa li da longifwa moinima ya pamba omayambule omatungo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.