Epangelo otali tale ngee otashi shiva li tote omayakulo opashiwana ovanyasha vaNamibia taa dengele, unene ngaa ovo tava di meefikola, oshinima osho South Africa naye a hala okuninga.
Minista wehongo, omaduto, ovanyasha, omaudano, omaunghulungu nomifyuululwakalo Sanet Steenkamp edi okwe di popya onghela penangeko lewilikongudu lipe lehangano lOmayakulo Ovanyasha lOpashiwana ledina National Youth Service (NYS) mOvenduka.
Okwa ti oshinima eshi osha hokwiwa kovanhu vahapu, ashike okwa londwela kutya onghatu keshe yoku shi tula moilonga otai pumbwa omapulaapulo, nosho yo omulandu neeveta.
“Opu na eenghundafana kombinga yomayakulo opashiwana taa dengele, unene ngaa ovanyasha ovo tava di meefikola,” Steenkamp ta ti.
“Epangelo paife otali tale ngee otashi shiva noikumungu aishe yomulandu ou.”
Okwa ti oshinima eshi osha pumbwa “okudilaadilwa nawa”, pakutala kutya opolohalama ei oi fike peni.
Steenkamp okwa ti opolohalama yOmayakulo Ovanyasha yOpashiwana oya hokwiwa kovanhu vahapu, novanyasha ve li lwopo18 000 ova ninga omaindilo va kufe ombinga molweefo etimulongo netiheyali lomudo 2026.
Okwa ti omwaalu uhapu womaindilo owa ulika kutya omayakulo aa fimana, ashike natango owa tula ehangano moshiponga shokukonakona nghee oikwanoipangifo i na okulongifwa nawa.
Minista okwa ti omikalo dokuyandja oimaliwa di li pamufika otadi ka pumbiwa ngee epangelo otali wedele eemhito okupitila momayakulo opashiwana.
Steenkamp okwa indila ewilikongudu lipe li nghonopeke elelo, ewiliko loshimaliwa newiliko nomaliko nomahangano omayakulo.
Okwa ti ewilikongudu nali kwashilipaleke kutya ehangano eli ole litula mo moilonga tai yandje eemhito dehongo kovanyasha moshilongo, omadeulo noilonga manga yo tali xwaxwameke eyambukepo lopashiwana nelongelokumwe.
“Onguduwiliki ya kola kai fi ashike oyo tai dimine omikanda odo da etwa kuyo.
Onguduwiliki oyo tai pula omapulo omondjila,” osho a ti ngaho.
Steenkamp okwa ti ewilikongudu nali tale unene kekwatelemo, omaduto nomauwa, mwa kwatelwa okukwashilipaleka kutya ovanyasha okudja koitopolwahoololo ya yooloka nomidingonoko dopaliko ove na omhito i fike pamwe yokumona eemhito dehangano eli.
Okwa ti eyokomesho lehangano inali vixwa ashike komivalu dovanyasha ovo va kutwa nokudeulwa, ashike nali vixwe yo komivalu daavo tava twikila ehongo, ovo va mona oilonga naavo va mona emhito di li xwepo domaxupilo.
Steenkamp okwa ti ewilikongudu nali kondjife ewiliko opo sha pumbiwa, nali amene omaliko oshiwana nokukwashilipaleka kutya ehangano otali eta oindjemo yovanyasha moshilongo i liwetikile.
