Epangelo laNamibia natango nali ete pouyelele kutya ola longifa oshimaliwa shi fike peni pepako lapelesidente Hage Geingob, shaashi ngeenge inali shi ninga otashi eta omapulo kombinga yelongo pauyelele nefiloshisho loshimaliwa shepangelo.
Eengudu dopolotika novandjadjukununi voikwapolotika ove na omalopulo kombinga yelongo pauyelele shi nasha noshimaliwa osho epangelo la longifa pepako laGeingob alishe.
Omupopiliko wongudu yoAffirmative Repositioning, George Kambala, ota pula kutya ouyelele nau yandjwe ngaashi sha kala hashi ningwa nale pomapako epangelo nomapendafule.
“Oimaliwa oyo ya longifwa pepako inai dja kehangano lokukwashilipaleka, oimaliwa yepangelo.
Navo nava longe pauyelele. Otwa hala ouyelele oo.
“Ngee okwa li va dula okuyandja ouyelele kombinga yaavo va yandja sha pefimbo leefya, natango otava dulu okuyandja olopota youyelele woshimaliwa osho sha longifwa koshiwana,” Osho a ti ngaho.
Omupopiliko wongudu yoIndependent Patriots for Change, Imms Nashinge, okwa ti kapu na etomeno lokupula kutya okwa longifwa oshimaliwa shi fike peni, ashike medina lokulonga pauyelele epangelo nali ninge eshi tashi pulwa “ningeni oshinima sha yela, ndele tamu lombwele oshiwana”.
“Ove na okupopya kutya oshimaliwa osha dja peni, shaashi shovaaluki otushi apa hashi di, otushi oshimaliwa apa hashi di. Shaashi osho oshikando shotete hatu kanifa pelesidente eli koshipundi, ondi wete kutya efimbo la wapala opo tu yandje ouyelele opo tu kale tushi shi kutya oinima ohai longo ngahelipi monakwiiwa,” Osho a ti ngaho.
Hamushangandjai wongudu yoPopular for Democratic Movement, Manuel Ngaringombe, okwa ti ongudu oya hala enyamuko notai ka pula oshinima eshi mEtivali eshi opaliamente tai ka ongala.
Omundjadjukununi wopolotika nomukulunhuwiliki wehangano lokuninga omapekaapeko e nasha nomilandu depangelo Graham Hoopwood naye okwa pula opo epangelo li yandje ouyelele kutya ola longifa ingapi pepako laGeingob.
“Oshimaliwa osha dja komutengenekwafaneko woshiwana, mutu moshikefa shoshimaliwa osho hashi longifwa meenghalo odo inadi teelelwa, sha yela kutya ove na okushi kalela po.
Medina lokulonga pauyuuki, otashi kala shi wa ngeenge osha ningwa moule weemwedi dishona shi dulife okuteelela omutengenekwafaneko tau ya,” Osho a ti ngaho.
Omupopiliko wouministili wouyelele nomakwatafano opaungoba, Shoki Kandjimi, Etitatu okwa ti omapulo naaye kombelewa yomuprima minista.
“Omukulunhuwiliki wetu okwa ti dengela kombelewa yomuprima minista wa yukilila, shaashi ovo omitwe da kula domapako aeshe epangelo,” Osho a ti ngaho.
Omukulunhuwiliki mombelewa yomuprima minista, Ben Nashandi, eshi a nyamukula komapulo okwa ti, ouministili wouyelele nomakwatafano opaungoba owa pewa eenghono koKabinete opo u popye oinima inasha nepako.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
