Epangelo lya landele Nandi-Ndaitwah oshihauto shoomiliyona N$2

Epangelo olya koleke kutya olya landela omuulikwahogololo gwopaupresitente gwongundu yoSwapo, Netumbo Nandi-Ndaitwah, etemba lya za oona lyongushu yoomiliyona N$2, ano oshihauto shoLand Cruiser SUV.

Ashike nande ongaaka, etokolo lya ningwa kepangelo olya tongononwa kuyamwe “ongehepeko” lyoshimaliwa shepangelo.

Oshihauto shoka shondilo otashi landelwa Nandi-Ndaitwah, nonande omupresitente Hage Geingob okwa li a tulapo oondjindikila dhokuya momalweendo inaaga pumbiwa osho wo elando lyiihauto okuza mo2020.

Nandi-Ndaitwah, ngoka a ningi omasiku i ipyakidhina niigongi ye yopetameko yopapolitika moshilongo, okwa li wo naye u uvika ta popi e li ompinge nelongithonayi lyoshimaliwa osho wo uulingilingi momitungilo dhongundu yoSwapo.

OSHAAYEHE

Minista gwiilonga niiyenditho, John Mutorwa okwa popi kutya oshihauto shoka oshi li mongundu yiihauto iipe yepangelo mbyoka ya landwa noshimaliwa okuza montengenekwathaneko yopashimaliwa yoshikako sho2023/24.

Okwa popi kutya oshimaliwa shoka sho odhekelwa okulanda iihauto yepangelo moshikakomumvo shika, oshi li poomiliyona N$25, noshimaliwa shoka okwa li sha pitikwa kegumbo lyopashigwana osho wo kokangundu kiiniwe yepangelo.

“Oshihauto shoka otashi ka longithwa ongehauto lyepangelo ishewe inashi gandjwa nenge sha nuninwa omuntu gwontumba kondandalunde,” osho Mutorwa a popi ngaaka.

Oshihauto shoka osha landwa kohi yethigathano lyelando lya ngambekwa, ngaashi tashi uthwa kOkatendo 31 kOveta 15 yo2015 yElando lyIinima yEpangelo, osho Mutorwa a gwedha po ngaaka.

Mutorwa okwa popi kutya elando lyiihauto yepangelo iipe olya ningwa okupitila melombwelo lya zi kOkabinete numvo, nonande omupresitente Hage Geingob okwa li a tula po oondjindikila dhokulanda iihauto yepangelo iipe okuza mo2020.

Omuleli gwongundu yoPDM, McHenry Venaani, oye gumwe gwomwaamboka ya nyana etokolo lya ningwa kepangelo okulandela Nandi-Ndaitwah oshihauto shoka, nokwe shi popile mewi lyomupresitente ngoka kwa li a tulapo oondjindikila dhelando lyiihauto iipe.

“Aaleli naya kala yeshi oshigwana uuthethe okukala ya fa ye na konasha noluhepo [lwoshigwana] omanga taya landa pwaana engambeko,” osho Venaani a popi ngaaka.

‘EHEPEKO LYOSHIMALIWA’

Omupekapeki gwoshikondo shomapekapeko gomilandu dhepangelo oInstitute of Public Policy Research (IPPR), Frederico Links okwa popi kutya keshi uvite ko kutya omolwashike elando lyoshihauto shoka lya talika ko lya simana, omanga pu na omashongo ogendji moshilongo ngoka ga pumbwa okuyapukilwa notaku popiwa kutya itashi ningwa molwashoka kapu na oshimaliwa.

“Shoka otashi monika ongehepeko lyoshimaliwa shaafuti yiihohela, omanga pu na iikumungu ngaashi [yomukundu] guukalinawa itaayi pewa oshimaliwa sha gwana,” osho a popi ngaaka. Links okwa popi kutya momutumba gwopashigwana mEtitatu, minista guunamapya nuuniimuna Calle Schlettwein okwa gandja ekemo kombinga yoshimaliwa oshishona sha pewa uuministili we, moka uuministili wuunamapya kwa li owala wa pewa okashona ke li pondjele yoopelesenda 0,8 dhomoshimaliwa oshindji shoka sha topolelwa iikondo ayihe yepangelo.

“Omasiku omatalala momutumba gwopashigwana, minista guunamapya nuuniimuna okwi indile oshimaliwa sha gwedhwa po shi longithwe mompumbwe yiikulya moshilongo. Ngele owa tala elando lyoshihauto shoka shondilo okuyelekanitha nompumbwe ndjoka, otashi ulike kutya epangelo kali wete kutya oshike shi na okutaliwa ko tango sha simana,” osho Links a popi ngaaka.

Omundjandjukununi nomunawino miikwapolitika, Rui Tyitende okwa popi kutya etokolo lyokutsikila nelando lyiihauto iipe yepangelo “oshinima lela shehepeko” lyoshimaliwa shepangelo.

“Ethimbo ongashingeyi okwe etha onkalo yokulanda iihauto yaanapolitika mboka ye li moombelewa.

Molwashoka oye li mo nelalakano lyokulongela oshigwana ndele hakukala pomagadhi, omolwashike ihaaya landa iihauto yawo yoyene ngaashi aakwashigwana haya ilandele yoyene?” osho Tyitende a pula ngaaka. Okwa popi kutya mboka taya longo moombelewa dhepangelo oye li mo nelalakano lyokulongela oshigwana, ndele haku longelwa koshigwana nenge okukala taya iningile nawa. “Onkalo ndjoka yokukala yi ihole yoyene nokwiikaleka puuhumi oya pumbwa okuhula. Opolitika oyi li kombinga yokuninga omahogololo omadhigu kombinga yomauwanawa, nokulandela iihauto aantu mboka taya vulu nale okwiilandela yoyene, osha talika ko ongetukano lyAanamibia mboka ya lombwelwa ya mange omapaya gawo nokwiidhidhimikila onkalo ondhigu yopamahupilo,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.