Tulimelila Shityuwete omonakandona womukondjeli manguluko Helao Shityuwete, okwa londwela kutya emanguluko loshilongo inali talika ko la fa ngeno exulilo loilonga, ta popi kombinga yokuhena oilonga noluhepo moshilongo.
Eshi kwa li ta popi poshivilo xupulifo shaShityuwete Olomakaya, okwa ti omumbwe yoilonga noluhepo moshilongo otali holola kutya emanguluko lopapolitika natango inali lundululilwa memanguluko lopaliko lOvanamibia aveshe.
“Itatu dulu okutala oshilongo omo onduba yovanhu itai mono oilonga ndee hatu ti kutya oilonga yemanguluko oya pwa,” osho a ti ngaho.
Okwa ti emanguluko olo la lwilwa kepupi laxe nali lundulukile memanguluko lokupalwifa eefamili, okumona oilonga, okumona ehongo, okumona eumbo lopamufika, okumona omayakulo opaunamiti nokutunga onakwiiwa puhe na oluhepo tali ngabeke eemhito.
“Onda hala okutwikila nokupula omapulo ehe fi apu, ndi popile ko ovanhu ovo va kala itava pwilikinwa, ndi twikile nokulwila ongushu nefikopamwe,” osho a ti ngaho.
Ta popi kombinga yefyo laxe, Tulimelila okwa ti oilonga yaxe kaya li ashike yekondjelo manguluko olo a lwila, ashike neenghedi yo odo a longa ounona vaye.
Okwe mu ifana kutya “ependa laye lokonooli”, ta ti kutya okwa longa ounona vaye okupula omanyamukulo kepangelo, okukondjifa ouyuki nokufikamena po ongushu yovanhu.
“Momido dange adishe di li o39, oove kwa li ependa letu konooli.
Paife owa ninga ombinga yokaalita ketu ndele paife ohatu twikile ko okudja apa,” osho a ti ngaho.
Manga vahapu ve shi Shityuwete ongomukondjeli manguluko, omunadolongo wopolitika, kounona vaye okwa li omuhongi oo e va honga okukondjela osho shi li mondjila.
Tulimelila okwa ti xe okwa li a itavela muNamibia a manguluka manga nokuli ina manguluka, ta hoolola okulwila onakwiiwa oyo kwa li ashike i li momadilaadilo aye.
Okwa ti yee noohailwa vakwao ova tala osystema tai popilwa koveta, kepangelo, koimaliwa, kovakwaita, keedolongo nokoilwifo ndee tava nukile pomutenya kutya itave i tambula ko.
“Okwa li ve na edilaadilo. Ova tala nghee ounyuni u li ndele tava anye okwiitavela kutya osho ashike u na okukala ngaho,” osho a ti ngaho.
Shityuwete okwa li a mangwa po pomido o31 ndee ta efwa eshi ta wanifa o50.
“Omido o16, okwa yandja onghalamwenyo yaye konakwiiwa ehe shii eshi tai ka kala. Oshinima shimwe osho puhe na ou te shi dimbwa,” osho a ti ngaho.
