Minista woikwafaabulika, oikwamina noikwanghono, Modestus Amutse okwa denga omufindo kefimano neenghundafana dopetameko notadi twikile novakufimbinga moshikondo shoikwamina, ta ti kutya epangelo olo alike itali dulu oku shi pondola moshikondo shoikwamina shaNamibia.
Amutse, pefimbo loshoongalele shomafiku aa nehangano ledina Emerging Mining Association of Namibia (EMAN), okwa yeleka kutya etulomoilonga liwa nolaalushe lokuweda ongushu keedjo detu dopaushitwe ole likolelela mekufombinga okudja kwaavo va kwatelwa mo moshikondo omu.
“Eyambukepo loshikondo shoikwamina shaNamibia itali dulu okuningwa kepangelo olo alike.
Otali pula elongelokumwe loshili novakufimbinga ovo ve li moshikondo, ovo eewino davo doilonga da fimana mokuduta po omilandu di li xwepo,” osho a ti ngaho.
Oshoongalele okwa li tashi lalakanene okwoongela omadilaadilo nokuxwaxwameka elongelokumwe metulomoilonga lomilandu dokumona omauwa okudja meedjo dopaushitwe.
Amutse okwa pandula EMAN eshi a yandja omukanda wavo u na ouyelele wa wana, oo wa tofa mo omikundu odo da taalelwa kovanhu ovo opo tave ya moshikondo shoikwamina moNamibia ndee ta yandje omayele okuyambula po ekufombinga lovanhu vomoshilongo moshikondo shoikwamina.
Koshivilo oko tuu oko, presidente wehangano loEMAN, Thekla Mutero, okwa udaneka elitulemo lehangano mokuyambidida oshikondo shoikwamina shaNamibia.
“Ovafukuli voikwamina vaNamibia ovo opo tave ya ove lilongekida okukufa ombinga moshikondo shoikwamina shoshilongo.
Ehangano letu oli lile po okukwashilipaleka kutya ovafukuli voikwamina vomoshilongo otava dulu paveta okukala ve na, okuyambula po nokumona omauwa okudja meedjo davo.
Onghee nee otwa tambula ko eenghundafana edi noministili otai ka lundululila eemhito mokweeta omauwa oshili,” Mutero osho a ti ngaho.
Mutero natango okwa holola onghumwe kombinga yengabeko lokulongifa oilongifo yopashinanena mokufukula oikwamina, shaashi oshinima eshi otashi ngabeke oilonga yovafukuli voikwamina vashona.
Shimwe vali, Mutero okwa yeleka efimano lomikalo da wilikwa nawa dokufukula oikwamina doshinanena odo tadi liufa komilandu dokuwilika nokwaamena nawa omudingonoko, ta ti omilandu di li ngaha otadi vatele ovafukuli voikwamina vashona mokushonopeka omikundu dopailonga nokunghonopeka omilandu dokufukula oikwamina domondjila notadi kalelele.
–NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
