Elelodoolopa laVenduka ola ti ohali didilike omafudiko e li lwopo960 komudo nande eenhele domaendo otadi pumbu paife.
Onghee nee muni, okwa pula ovakalimo opo va kendabale vali omukalo wokuxwika po omidimba ponhele yokufudika.
Momaendo e li aheyali mOvenduka, atanho ee hadi filufilu, paife avali ashike e na eenhele – Oponganda noPoionespark.
“Elelo loshilando otali pula ovakalimo opo va kendabala vali nokuxwika po omidimba.
Okuxwika po omidimba okwa li kwa tulwa moilonga pefimbo lomafaneko,” Lydia Amutenya ta ti.
“Paife, etata lomayakulo omafudiko keshe omwedi omidimba ohadi xwikwa po.
Elelodoolopa otali twikile nokutwa ovakalimo omukumo va tale vali koshinima eshi opo tashi dulika, omanga tali kwashilipaleke kutya omahoololo omafudiko oludi keshe opo e li nokwa fimanekwa nawa pamufyuululwakalo,” osho a ti ngaho.
Amutenya okwa ti elelodoolopa ohali didilike omafudiko e li lwopo16 fiyo 20 moshivikle, ile omafudiko e li lwopo960 komudo momaendo amuni, pamwe nokuxwika po omidimba di li lwopo480 komudo, di li lwopo40 komwedi.
Okwa ti muni natango ina mona eenhele da wedwa po dokuninga omaendo ngee omaendo okoRocky Crest a hada.
“Omaendo natango otaa tungwa, ashike ee li pokumanifwa.
Ota kutengenekwa kutya omaendo aa otaa ka longa fiyo eedula di li 11 ile di dulife po. Elelodoolopa otali twikile nokukonga eenghendabala tadi lalakanene okuwedela omaendo oo e li po nale nosho yo okutala komukalo wokufudika omunhu mombila mu na nale umwe,” Amutenya ta ti.
Oshinima eshi ohashi ningwa omunhu ta fudikwa mombila mu na nale omunhu puhe na okupiyaaneka olutu lomunhu oo a fudikwa mo nale.
MOvenduka , omunhu wotete oha felwa elambo la ya moule eemita di li lwopo2.44 ndee omutivali otai i ashike moule eemita mbali.
“Oshinima eshi otashi ende tashi tambulwa ko keefamili unene, nelelodoolopa ohali didilike oshinima eshi shokufudika ovanhu vavali melambo limwe luhamano ile lwomulongo momwedi,” osho a ti ngaho.
OMAENDO A VALEKWA
Amutenya okwa ti nande otaku tiwa omaendo e li atanho aa hada, opu na ovanhu ovo va valeka eenhele momaendo nohava futu oshimaliwa komwedi.
Okwa ti muni okwa fimaneka oidila yopamufyuululwakalo nopamhepo kombinga yomafudiko nokuxwika po omidimba nota twikile nokukala e litula mo mokuyandja omahoololo oo a fimaneka omufyuululwakalo, manga yoo ta xwaxwameke elongifo ledu nawa okupitila momahongo oshiwana omikalo dimwe da yooloka dokufudika – odo da kwatela mo okufudika ovanhu vavali melambo limwe nokuxwika po omidimba.
Amutenya okwa weda po kutya okuxwika po omidimba paife ngaha oko ashike omukalo u na ombilixa, taku eta ovakalimo va dule okumona omayakulo nawa.
Oshilyo shopaliamente shongudu yoAffirmative Repositining Vaino Hangula okwa ti ota popile okuxwika po omidimba, ta ti otaku xupifa onhele.“
Ohandi pula kuningwe omisiuma omo tamu kala hamu tuvikilwa omite domidimba odo da xwikwa po. Otashi ka xupifa oshilando.”
Ashike nee, opu na omumbwe yokuhonga ovanhu.
“Otashi dulika pa kale pu na omatomeno opamufyuululwakalo nopamhepo okukondjifa oshinima eshi, ashike nomahongo omondjila, onda itavela kutya ovanhu otava ka kala ve na ehalo lokuxwikwa po,” osho a weda po ngaho.
Bishop Lukas Katenda okwa ti oukwamhepo ou na ondjokonona yokufudika; ashike nee, ita kelele nande okuxwika po kwomidimba.
“Ngee kapu na edu, ovanhu otava dulu okuxwikwa po ndee omite tadi fudikwa she likolelela komaitavelo omifyuululwakalo a yooloka,” osho a ti ngaho.
Omuleli welelo lopamufyuululakalo lOvaherero Uapimbi Ngareja okwa ti omufyuululwakalo wOvaherero itatu pitike okuxwika po omidimba shaashi osha puka pamufyuululwakalo.
“Otwa itavela movakwamungu vetu. Ngee omunhu okwa xwikwa po otashi ti ina tambulwa ko ile okuhepeka olutu.
Itatu kala tu shii kutya oshike sha ningilwa ovaholike vetu konima va xwikwa po,” osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
