ELELO lyondoolopa yaShakati mOshana olya tseyitha kutya otali ka pombela omahala gomalukalwa mondoolopa ya Shakati nomomalukanda ge yi dhingilila nelalakano lyokudhipaga oomwe.
Etseyitho ndika olya ningwa komupopiliko gwelelo lyondoolopa, Jackson Muma. Muma okwa ti iilonga yokupombela oya tamekele mo17 Novemba 2015 notayi ka hula mo21 Decemba 2015. Okwi indile kaakalimo ayehe yomOshakati ya longele kumwe naaniilonga yopombela, ta ti inaya kala nomalimbililo nenge nuutile kombinga yomuti tagu longithwa mokupombela, oshoka ogwa konaakonwa nawa.
Oshikonga shika osha tamekele omumvo gwa zi ko. Pokati mpoka Muma okwa ti wo elelo lyaShakati olya tokola okukaleka ondoolopa ya ya yela. Omathimbo ga zi ko, meya gwondoolopa yaShakati, Onesimus Shilunga, okwa tula mo oshikonga shokwoopaleka omalukanda gomomudhingoloko shedhina “Oshakati sha yela otashi tameke nangoye”, shokupahula oshigwana nkene ku na okukalekwa ondoolopa ya yela.
Shilunga okwa ti elelo oli na oshinakugwanithwa shokutsu aantu omukumo noku ya hwahwameka ya opaleke ondoolopa, nelalakano lyokuhilila aapunguli mOshakati. Aantu ayehe otaya pulwa yo opaleke pomahala gawo.
Meya ti indile aanty yaa ekelehi iiyagaya shaampoka, ta ti nayi ekele momandoloma. Okwa pandula aanangeshefa naanamagumbo mboka haye shi ningi.
Shilunga ta pandula ongeshefa yaSpar, Ranni Traders, KFC, Maniki Printing, Sub Miller Namibia, naayehe haya kwathele elelo pethimbo lyiilonga yokwoopaleka ondoolopa.
Kakele kaakwashigwana, omahangano 14 ngoka haga opaleke ondoolopa nago oga kutha ombinga.
