Omunapaliamente wEumbo Etivali lOpashiwana Augusta Katembo okwa ti oupyakadi wopamadilaadilo momikunda luhapu owa kwatakanifwa noinima ya nyika ondjongo noupule nosho yo omafingo, osho tashi xwaxwameke omaudeko a puka, outondwe nokulikalela.
Katembo okwa ti eefamili ohadi holeke ovakwapata ovo ve na omaudu opamadilaadilo medina lohoni nomaudeko apuka, osho sha ngabeka eemhito davo dokumona epango nomayambidido.
“Oupyakadi wopamadilaadilo momikunda luhapu owa udikiwa ko epuko.
Eshi ohashi etwa komaitavelo a puka nomautondwe opamufyuululwakalo.
Oudu wopamadilaadilo luhapu owa kwatakanifwa nondjongo nomafingo,” Katembo ta ti Etivali pefimbo leenghundafana di na sha nonotwaveta youndjolowele wopamadilaadilo.
Katembo okwa weda po kutya oshiwana shokomikunda otashi mono oixuna koinima ngaashi oluhepo, okuhena oilonga, omayakulo opaundjolowele notashi ehama kolotu nokeemwenyo.
Okwa ti omikundu edi oda naipalekwa koinano ile yoku ya koipangelo neyandjo lomayakulo oundjolowele wopamadilaadilo.
Katembo okwa ti onotwaveta youndjolowele wopamadilaadilo otai dulu okuungaunga nomaudeko a puka neeveta dikulukulu odo da dopa okwaamena omaufemba ovanaudu.
Katembo okwa pula yo vali omayakulo opaundjolowele aa ndjakanekwe noshilongo ashishe ndee ta ti omayakulo oundjolowele wopamadilaadilo naa ye koitopolwahoololo noikandjohoololo.
Okwa yambidida onotwaveta ashike okwa indila i tulwe moilonga okudja petameko.
Omunapaliamente mukwao, Joseph Sikongo, okwa popya kutya onotwaveta otai pula kutotwe oshikondo shoundjolowele wopamadilaadilo shi na sha noipangelo youndjolowele wopamadilaadilo moshilongo ashishe.
Okwa ti oshinima eshi onghatu iwa lela, ashike okwa pula opo epangelo li yandje oimaliwa ya wana li kwashilipaleke kutya oshikondo eshi osha wanifa po oilonga yasho nawa.
“Omukalo ngaa oo twa longifa eshi Okolona ye tu ponokela, oo ngaa natu longife paife manga efimbo inali pwa po, shaashi oupyakadi wopamadilaadilo owa ninga omukundu wakula moshilongo omu,” Sikongo ta ti.
