Omunandjungu moikwapolotika Henning Melber okwa ti ekufombinga laJerry Ekandjo mekondjle manguluko laNamibia oshi shiivike, ashike efimbo ola fika opo a kafude po nombili.
Melber eshi okwe shi popya konima yomasheko aEkandjo kombinga yepangelo loSwapo, olo ta ti ola nghundipalekwa kongudu vohandimwe ovo ve li mo.
“Omatopauko oo e li moSwapo Ekandjo nae okwa kufa mo ombinga. Ota dulu okupopya kombinga yonghalo omo ongudu i li. Ashike otashi ulike ashike omalunduluko oo ovanhu vahapu va tambula ko, mwa kwatelwa ongudumutima yongudu omo yee e li oshilyo,” Melber osho a ti ngaho.
Melber okwa ti oshinima osho sha ningwa kuEkandjo moshilongo osha pumwa okudimbulukiwa, ashike omafimbo aa kala nokulunduluka.
“Ondi wete kutya okwa pumbwa okuya moshipundi shetulumoko. Voo ondjokonona oyo ya fimanekwa, ashike kave shi vali onakwiiwa,” Melber osho a ti ngaho.
Okwa ti oshinima eshi shongud omwa kwatelwa omatokolo a nigwa kuvahapu.
“Omaveta yongu oya kwatela mo okutambula ko omatokolo oo a ningwa kuvahapu mongudu, nande okwa talika ko taa pukifa ile inaa tabulwa ko, ponhele yokukala ta ponokele ongudu moshiwana a hala okwiishundula,” Melber osho a ti ngaho. Okwa ti kutya omapopyo aEkandjo oo ta ti omuhanganifi kae li mondjila shaashi okwa dana onghandangala mokutongola ovanhu.
“Omanga eshi tashi ulike omadilaadilo aye noudemokoli waNamibia, omapopyo a ye naa talike nawa. Eengudu domilameno odi na okupandula nokutyapula onghadangala yaye, shaashi odula yomahoololo,” Melber osho a ti ngaho.
Ekandjo Etitano la dja ko okwa li a ponokela Swapo, ta ti ongudu pi li momake a puka.
Ekandjo okwa lundile ongudu kutya otai ningi oinima ya puka nokamu na elongo lopauyelele oule weedula omuwoi.
Momapopyo aye Etitano, Ekandjo okwa ti elongelokumwe moSwapo inali kala liwa okudja ngaa momudo 2015 nomukumo moliyo imwe yongudu owa kala tau I pedu.
“Eenhele melelo osha kala oshipopiwa shefiku, ovanhu otava kondjele elelo moSwapo.”
Okwa popya oinima ihapu kombinga yongudu, mwa kwatelwa oupyakadi u li melelo, oukwamuhoko novanhu va dja ashike koitopolwahoololo imwe ovo ve li melelo.
Ekandjo okwa popya koshikumungu shoFishrot ongoshinima shakula mongudu osho yo omatokolo a ningwa okutopola ongudu oo a nghundipaleka Swapo neenghono.
Natango okwa lundile vali ongudumuti yongudu omo naye e li oshilyo, kutya oya ninga oshinima sha puka eshi ya undulila komesho oshoongalele osho hashi hoolola pelesidente fiyo okuApilili modulatai ya.
Ekandjo natango okwa lundile ongudumutima kutya oyaulika okuhena odino noinai fimaneka ekotamhango longudu metokolo layo lokuundulila oshoongalele shokuhoolola pelesidente wongudu komesho.
Natango, omunandjungu moikwapolotika Ndumba Kamwanyah, okwa ti momasheko aEkandjo kombinga yoSwapo omu na ngaa oushili shaashi ongudu oya kala ngaa ina omaupyakadi eedula twa dja.
“Otashi dulika a monike a fa oshidukuduku shaashi okwa li a hala okukufa ombinga moupelesidente wongudu, ashike ota popi oinima I na oshilonga oyo ongudu ya mbumbwa okutala. Ongudu oya teya eemhango dayo oikando ihapu,” Kamwanyah osho a ti ngaho.
Kamwanyah okwa ti vali osha fimana opo keshe ongudu I kale ya fimaneka ekotamhango layo, oshinima osho ta ti Swapo okwa kala teshi henuka.
“Ondi wete kutya okuna oshitwa naSwapo okwe li kanifa kombinga yokulandula nokuliufa kekotamhango laye,” Kamwanyah osho a ti ngaho.
Hamushangandjai woSwapo Sophia Shaningwa Etitano okwa li a pewa elombwelo kuhaende Richard Metcalfe, wokehangano lovakalelipo vopaveta ledina Meltcalf, opo a ninge oshoongalele osho hashi hoolola pelesidente omanga omafiku 04 Mei inaa fika ile ngee inashi ninga ota twalwa komhangu.
Ehangano lopaveta eli ola kalela po oilyo yoSwapo itatu, Reinhold Shipwikiineni, Peter Shituula naJosua-Vaino Martins.
Momukanda wa shangwa momafiku 06 Apilili, ova lombwela Shaningwa kutya etokolo longudumutima opo iha ninge oshoongalele eshi moule weemwedi konima yefyo lapelesidente Hage Geingob kakwa li li mondjila.
Omwedi wa dja ko, ongudumutima yongudu yoSwapo okwa li ya tokola oshoongalele shokuhoolola pelesidente otashi ka ningwa momafiku 19 Apilili 2025.
Haende wongudu yoSwapo Sisa Namandje okwa li a popya kutya mekotamhango loSwapo kamu na oshinima tashi ti ongudu nai ninge oshoongalele osho neudo.
Shaningwa, nomupedu waye Uahekua Herunga nomupopiliko woSwapo, Hilma Nicanor, kakwa li va nyamukula omapulo oo kwa li va tuminwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
