EINDILO lyosikola yopaumwene yedhina Windhoek Gymnasium Private School lyehala lyevi okutunga osikola yoondondo dhopevi olya li lya tindwa kelelo lyondoolopa yaVenduka.
Osikola ndjika yopaumwene oya li yi na ohokwe okulanda po ehala koomiliyona N$3,2.
Shi ikwatelela kombaapila yolaata yelelo lyondoolopa ndjoka ya li ya hololwa moshigwana poshigongi shokomwedhi sholaata yelelo lyondoolopa mEtine lyoshiwike sha zi ko, eindilo lyehala lyevi olya li lya ningwa kehangano lyokoSouth Africa lyedhina Curros Holdings ndyoka olyo yene yosikola yopaumwene ndjoka yo-Windhoek Gymnasium yi li momudhingoloko gwaKleine Kuppe mOvenduka.
Olaata yelelo oya li ya gandja etompelo kutya ehala (lyo Erf 853 li li moKlein Kuppe) olya nuninwa omangeshefelo notali ka landithwa po ashike okupitila mooteendela. Moshinima shika, omahangano gatatu oga ninga nale omaindilo okulanda po ehala ndyoka.
Ehangano lyo-Curros Holdings olya hala okutunga osikola yoondondo dhopevi kondando yoshimaliwa shoomiliyona N$200 ashike olya kala tali nyengwa okumona ehala melelo lyondoolopa yaVenduka okuza mo-2017.
Odokumente yelelo lyondoolopa oyu ulike kutya omuluntuwiliki gwosikola ndjoka Colette Rieckert okwa li a ningi eindilo momasiku sho ga li 1 gaJuni 2018 okulanda ehala lyo-erf 853 ndyoka li na uunene woosikweemeta 3 455 noli li mokoona yomapandaanda lyoMowe noSossusvlei mo-Kleine Kuppe.
Manga inaaya holola ehalo lyehala ndyoka, ehangano ndika olya li lya ningi onkambadhala okuninga omaindilo gokulanda po ehala lyoErf-350 momudhingoloko natango gwo-Kleine Kuppe nelalakano natango lyokutunga osikola, ashike kaya li taya vulu oku li pewa oshoka oya lombwelwa kutya elelo lyondoolopa yomoshilando oye li nunina Uuministili wElongo okuza mo-2006, ashike sigo onena inali tungwa sha.
Rieckert okwa li a shangele omukuluntuwiliki gwelelo lyondoolopa yaVenduka Robert Kahimise momasiku sho ga li 1 gaJuni 2018 ta pula opo elelo lyondoolopa li ninge etokolo lyahugunina ngele ehangano lyawo otali vulu okulanda po ehala ndyoka (lyo- erf-350) nenge hasho.
“Oshinima shokugwedhela ehala lyosikola opo tu gandje ompito yaanasikola oyendji mboka ya pumbwa omahala posikola yetu, osho wo ompumbwe yomahala gaanona poosikola mOvenduka osho wo moshilongo, onkene osha simana unene kutse,” Rieckert a ti ngaaka modokumente a shangele omukuluntuwiliki gwelelo lyondoolopa yaVenduka.
Rieckert okwa li a gwedha po kutya ngele o-erf 350 yoko-Klein Kuppe itayi vulu okugandjwa nena oya pyakudhukwa okulanda po omahala ngoka he li po momudhingoloko ngoka gwa-Klein Kuppe nenge gwaRocky Crest. Ehangano lyo-Curros Holdings olya li wo lya ningi omaindilo opo li lande po omahala ngashi o-Erf R497 no-Erf 350 ngoka ge li momudhingoloko gwa-Olympia.
Elelo lyondoolopa olya li lya gandja eyamukulo momasiku sho ga li 25 gaJuli 2018 kutya o-Erf 350 olya nuninwa epangelo ano Uuministili wElongo omanga ehala ekwa wo li li ko-Olympia olya fulilwa iiyagaya onkene itali vulu okutungwa.
Gunwe gomwaamboka ya li ya ningi omaindilo gehala lyo-erf 853 omundohotola Martin Blair gokoshiputudhilo shopaunamiti shedhina American University of Medicine, ngoka a li a ningi eindilo lye mo-2011 opo a tunge po omatungo gomalukalwa gaailongi osho wo aalongi yokoshiputudhilo shawo.
Ehangano lyedhina Ya Negumbo properties CC olya li lya ningi eindilo lyehala ndyoka mo-2014 nelalakano lyokutunga po omagumbo, omanga ehangano lyo-Pamwe Consortium lya li wo nalyo lya ningi onkambadhala yokulanda po ehala ndyoka.
Olaata yelelo oya ningi etseyitho kutya ehala ndyoka lyo-ERF 853 otali ka landithwa po okupitila mootendela, moka kehe gumwe e na ompito yokuya methigathano.
Olaata yelelo lyondoolopa yaVenduka olya ti natango olya tegelela epitikilo okuza kUuministili wOondoolopa nOmayambulepo gOkomikunda opo ya shange odokumente yeuvathanotsokumwe yelanditho lyehala osho wo ompango yuuthemba wokulandulula ehala ndyoka kelelo lyondoolopa.
Osikola yopaumwene yo-Gymnasium ndjoka yi na osikola yoondondo dhopevi noyopombanda oyi na ompumbwe yehala okutunga osikola tayi kotha oomiliyona N$200 yondondo yopevi osho wo ehala lyomaudhano lyaanasikola yeli 1000.
Inashi yela ngele natango Uuministili wElongo inawu hala natango okugandja ehala kosikola yo-Windhoek Gymnasium.
The Namibian okwa lopotele omvula ya zi ko kutya ominista onkulu Katrina Hanse-Himarwa okwa li a tindi okulanditha po ehala ndyoka lya nuninwa Uuministili wElongo okuza kelelo lyondoolopa yaVenduka kosikola yo-Windhoek Gymnasium.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
