Eindilo loNeka ola undulilwa komudo 2025

… Shaningwa okwaanya okushakena nelelo lipe loNeka

Ongudumutima yoSwapo oya undulila komesho eindilo lehangano lounona vekondjelo manguluko opo li kale oshitai shoSwapo.

Etokolo eli ole ya konima eshi ehangano loNeka laanya okuundulila komesho oshongalele shalo osho sha li kOtjiwarongo ngaashi hamushangandjai woSwapo Sophia Shaningwa kwa li a pula.

Eedjo di li popepi noshinima eshi oda ti shaningwa okwaanya vali eehelo opo a shakene nelelo lipe loNeka konima yoshoongalele osho kwa li sha nyika eenamanana.

The Namibian oya lombwelwa kutya eundulilo komesho okwa li la shiivifwa koshoongalele shongudumutima konima eshi omuunganeki woSwapo koshitopolwahoololo shaShikoto, Armas Amukwiyu, a pula kombinga yeehelo loNeka opo i ninge oshitai shoSwapo.

Omupedu pelesidente wongudu, Netumbo Nandi-Ndaitwah, vati okwa dilaadila opo oilyo yoNeka i kambainine ongudu momahoololo twa taalela muNovemba, omanga pelesidente Nangolo Mbumba ta pula opo oshikumungu eshi shi undulilwe komesho kodula tai ya.

Omukulunhuwiliki woNamWater Kadiva Hamutumwa okwa findana po oupelesidente woNeka omwedi wa dja ko koshoongalele osho sha li kOtjiwarongo.

Eehelo lehangano ole ya eshi Swapo eedula da dja ko kwa li a ya kumwe nehangano loonakulwa va kulu.
Ehangano loNeka oli na ovanhu ovo va dalelwa naavo va kulila kombada, ola tukulwa meengudu mbali, oNeka yoovene nounona vekondjelo manguluko.

Odjo imwe i li popepi noSwapo, oya ti eengudu adishe oda yandja omikanda opo di ninge oitai yoSwapo . “MoNeka paife omu na ovanhu ovo tava yambidida Hamutumwa, omanga mounona vo vakondjeli manguluko mu na ovanhu tava yambidida Rauna Amutati,” Odjo osho ya ti ngaho.

“Konima yoshoongalele shoNeka shokomudo osho sha li kOtjiwarongo, elelo loNeka lipe okwa li la ya kombelewa yahamushangandjai opo va ude kutya eindilo lavo ola fikama peni, ashike okwe va pula opo va shune ndee tava ka tala olopota yaasho sha ningwa koshoongalele shavo shokomudo,” Odjo osho ya ti ngaho.

Ashike nee, pelesidente mu kulu woNeka Rauna Amutati, okwa ti ongudu younona vekondjelo manguluko ongudu yomalihafifo mu na ashike oohandimwe voNeka.

Okwa ti ka li eshi ngee ongudu oyo okwa li ya ninga eindilo opo i ninge oshitai shoSwapo.

“Odo eenghundana kwaame,” Amutati osho a ti ngaho. Angula oo a li nale hamushangandjai woNeka Etitatu ina tya ko sha ketopoko olo li li moNeka nokuye ongoshilyo shongudu younona vekondjelomanguluko.

“Mutu shuna kodjo yoye ndee toka pula oukwashili moshinima osho to popi,” Osho a ti ngaho.

Oilyo yongudumutima yoSwapo ivali Etivali oya ti ongudu oya ti Neka na yandje tete olopota kombinga yoshoongalele shaye shokomudo osho kwa li va ninga kOtjiwarongo.

Olopota i na okuyandjwa kombelewa yahamushangandjai wongudu omanga inai ya kopolitburo nokongudumutima.

“Kashi shi shoshili kutya eindilo olaanywa. Ongudumutima oya ti elelo loNeka oli na okuteelela olopota opo kulandulwe omilandu odo di na okulandulwa,” Umwe womoilyo osho a ti ngaho.