Banner Left

Eindilo lokutopola oitopolwahoololo itatu laanywa

Efano: La yandjwa OITOPOLWAHOOLOLO … Okomisi yokutenda omadu oya yandja olopota kupelesidente Nangolo Mbumba oyo tai holola kutya kapu nande oitopolwahoololo ipe tai ka totwa ngaashi Ovanmibia vamwe kwa li va pula shi ningwe.

Eundilo lOvanamibia lokutota oitopolwahoololo ipe moshilongo olaanywa.

Omunashipundi wokomisi yokutenda omadu, omhupanguli ta vatele Petrus Unengu, okwa ti etokolo e li ola ningwa kwa talika koilongo ikwao yokoumbuwanhu waAfrica oyo ya hala okukala ina oitopolwahoololo ihapu.

“Tete, okutala koilongo yomoumbuwanhu waAfrica, nosho yo oilongo ngaashi Nigeria naSaudi Arabia, oyo i na oshiwana shihapu, ashike natango oi na oitopolwahoololo ishona,” Osho a ti ngaho Etitatu.

Eindilo limwe ola dja kovakalimo vomoshitopolwahoololo shaShikoto, ovo kwa li va hala oshitopolwahoololo shi topolwe moipambu ivali.

Natango eindilo la faafana okwa li la dja vali kovaleli vopamufyuululwakalo ovo kwa li va hala oshitopolwahoololo shaHangwena shi topolwe moipambu ivali.

Ovakalimo vomoshitopolwahoololo shaTjozondjupa navo ova pula yoo oshinima sha faafana, New Era osho kwa li a lopota ngaho.

Okwa li va yandja kutya eembinga mbali doshitopolwahoololo nadi kale tadi ifanwa Otjozondjupa North nOtjozondjupa South.

Eindilo limwe olo kwa li la twalwa kokomisi odula ya dja ko omwa kwatelwa ovakalimo vokoZambezi tava ti eengaba odo di li pokati kaZambezi noKavango Ushilo nadi shunifwe monika koMukuvi pukwatelwe po ombili.

Okomisi oyaanya omaindilo aa, ashike nande ongaho, oya popila okuninga omalundululo moitopolwahoololo iheyali, oikandjohoololo i li 10 ipe nosho yo okulundulula eengaba doikandjohoololo i li 61.

Okomisi natango okwa li ya pula kulukululwe oikandjohoololo ivali.Olopota yokomisi okwa li ya leshwa kupelesidente Nangolo Mbumba keumbo lepangelo mOvenduka Etivali. Oidjemo yolopota yokomisi oya undulilwa komesho oikando ivali okudja ngaa pokati kodula ya dja ko.

Mbumba Etivali okwa koleka kutya itapa ka kala nande oitopolwahoololo ipe, nonghee nee kapu na nande oongoloneya vape.

Unengu, pefimbo lokukundafana kombinga yolopota, okwa fatulula oinima inhe oyo ya longifwa okutokola ngee otaku wedelwa ile otaku tendululwa eengaba.

“Shimwe: okutala ngee omayakulo ngaashi eengeshefa oku li ngaa popepi, ovakalimo nava dule okweenda va ka mone omayakulo; oshitivali: otashi kosho ingapi okutota oitopolwahoololo noikandjohoololo ipe; oshititatu: onghalo yomaxupilo moshilongo; oshitine: omwaalu wovanhu ovo va hanga okuhoolola,” Osho a ti ngaho.

Oshinima shimwe vali ounene wedu moitopolwahoololo noikandjohoololo oyo ya tumbulwa.

OTU NA NGAA OSHIMALIWA SHILI?
Omundjadjukununi woikwapolitika Erika Thomas Etivali okwa pula ngee osho tashi pulwa kokomisi otashi ka vatela ovakalimo ile eekamusela.

“Osheshi oikandjohoololo yakula unene kuvo, ile kapu na oshimaliwa, osho tashi imbi eekamusela odo di longe ngaashi di na okulonga?” Osho a pula ngaho.

Thomas okwa ti ookamusela vopaitopolwahoololo ihava vatele ovakalimo vomoikandjohoololo yavo.

“Kave na efimbo olo, shaashi kave na fiku va twalele omayakulo oko. Kapu na eepate dopamufika dovanhu ovo. Oshitivali, kapu na eepomba, oipangelo, eefikola naikwao,” Osho a ti ngaho.

Omundjadjukununi wopolitika umwe Ndumba Kamwanyah, Etivali okwa twa kumwe netokolo lokomisi iha tote oitopolwahoololo imwe.

EYANDJO LOMAYAKULO LI LI XWEPO
“Okutota oikandjohoololo i li 10 ipe otashi ti otapu kala pu na ovakalelipo vahapu vopaitopolwa, osho tashi dulu okuxwepopeka eyandjo lomayakulo nokweeta epangelo popepi novanhu.

“Ashike nee, eshi natango otashi ti epangelo ola pewa vali omukundu woshimaliwa, shaashi ovanambelewa vahapu, eembelewa dihapu noikwafifo otai ka pumbiwa,” Osho a ti ngaho.

OITOPOLWAHOOLOLO I LI 14

Konima Unengu a yandja olopota, Mbumba okwa pandula okomisi eshi ya dimbulukwa oilanduli yaasho kwa li tai pula.

“Ovanhu otava hange oimaliwa peni? Omayakulo oku li kokule noshiwana peni? Ove shi ninga osho. Okwa li yoo vali va tala nawa komwaalu wovakwashiwana oo tu na.

“Inaku totwa ashike omahangano opo ku hoololwe ovanhu va ye peemhito odo.
Paife oongoloneya vape. Ombili,” Osho a ti ngaho.

Pelesidente ota ka yandja olopota ei kOkabinete.
“Okabinete oke li olutu laxuuninwa mokuninga omatokolo moshilongo, kashi shi pelesidente,” Mbumba osho a ti ngaho.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News