… Ola pumbwa eemiliyona di li N$250 li kandule po oudjuu ou
Ehangano lokuninga omavalulo laNamibia ledina Namibia Statistics Agency (NSA) ola ti omumbwe yoshimaliwa oye li tula moudjuu wokupitifa ouyelele kombinga yomavalulo oshiwana pefimbo.
Omukulunhu womavalulo Alex Shimuafeni okwa lombwela oThe Namibian kutya opo ehangano li pewe oshimaliwa sha wana, ola pumbwa omutengenekwafaneko woshimaliwa shi fike peemiliyona N$250.
Momutengenekwafaneko waxuuninwa, oNational Planning Commision, ehangano olo hali wilike ehangano lokuninga omavalulo laNamibia, ola mona oshimaliwa shi fike peemiliyona N$232 okundja momutengenekwafaneko.
Oshinima eshi shekateko fiyo opapa osha kuma omavalulo e na sha noiyemo noipumbiwa yomomaumbo oo kwa li a ningwa momudo 2015/16.
Oshinima eshi okwa li shi na okukala hashi ningwa keshe konima yeedula nhano, tashi yandje ouyelele kombinga yokuhafika pamwe moshilongo.
“Ngee katu na oshimaliwa sha wana, ohatu ningi eelopota odo ndee hatu ningi osho shi na okuningwa po,” Shimuafeni osho a ti ngaho.
Nomavalulo oshiwana okwa li a katekwa needula mbali molwoinima ya fimana.
Omukulunhuwiliki womavalulo mukulu waSouth Africa, Pali Lehohla, okwa ti omu na omumbwe yoshimaliwa shokuninga omavalulo moAfrica ndee omumbwe youyelele ohai shi ningi shidjuu opo epangelo li dule okukalela po oinima yonumba, shaashi kapu na nande ouyelele tau yambidida omapopyo kombinga yomumbwe yomayakulo.
“Edilaadilo lokuyandja omayakulo koshiwana ohali kana mo mepangeloa nosho yo mehangano shaashi okuninga omivalu itaku pewa vali oshimaliwa. Onghee nee ohashi tu ningile shidjuu okuninga omatokolo oo taa vatele oupyakadi ou u li po,” Lehohla osho a ti ngaho, ta weda po vali kutya oshi li oshinakuwanifa shepangelo okukwashilipaleka kutya okuninga omavalulo nokwoongela ouyelele okwa yambididwa noshimaliwa.
“Omapangelo ihaa kongo naana omatanga ovakwaita a yooloka moilongo yavo. Omivalu oda fa omatanga ovakwaita. Oku li oshinakuwanifa shepangelo,” Lehohla osho a ti ngaho.
Okwa ti epangelo itali dulu okuninga omilandu nawa ngee kali na ouyelele wa pumbiwa.
“Dilaadila nawa kutya omavalulo ohaa dana onghandangala ya fimana momafaneko epangelo. Ashike peemhito dihapu omavalulo ohaa dimbiwa,” Lehohla osho a ti ngaho..
Omunawino moinima ya pamba omaxupilo Omu Kakujaha-Matundu okwa ti omavalulo keshe efimbo okwa fimana meliko nosho yo meenghendabala deengeshefa.
Kakujaha-Matundu okwa ti, omivalu dihe li pefembo kadi na oshilonga shaashi ihadi holola vali ouyelele womondjila.
“Omivalu da pumbiwa nodi li pefimbo oda fimana keliko nosho yo keengeshefa,” Osho a ti ngaho.
Okwa ti oupyakadi wokuya epitifo neyandja louyelele moshipala otau dulu ashike okukandulwa po ngee osheetifi sha monika mo.
“Ngee oupyakadi owa shiivika, nau katukilwe onghatu meendelelo ngaashi sha pumbiwa,” Kakujaha-Matundu osho a ti ngaho.
Omunawino umwe moinima ya pamba omaxupilo, Josef Sheehama, okwa ti oshinima eshi shokukala itaku yandjwa oshimaliwa sha wana kehangano lokuninga omavalulo moshilongo oshi li sha nyika oshiponga neenghono, shaashi otashi dulu okupiyaaneka onghalafano neliko loshilongo.
“Eshi otashi imbi epangelo li ninge omalongekido ku na efimbo nokuninga omatokolo omondjila,” Sheehama osho a ti ngaho.
Sheehama okwa ti, keshe Omunamibia na kale ta mono ouyelele u li mondjila. “Omumbwe youyelele tau dulu okulineekelwa nou li mondjila otai i eyokomesho moshipala nosho yo oi li ya nyika oshiponga koinima ishona meliko oyo tai dulu okuvatela oikondo yeliko yakula,” Sheehama osho a ti ngaho.
Natango, omupopiliko wongudu yoIndependent Patriots for Change Immanuel Nashinge Etitatu okwa lombwela oThe Namibian kutya okukateka omivalu epuko olo inali pumbwa okweendululwa vali.
Okwa ti ngee kapu na omivalu edi otashi ti omutengenekwafano wepangelo otau fiye ko ovanhu vamwe.
“Ovanhu vahapu kakwa li tava dulu shaashi inava longifa omauyelele avo akulu ile omwaalu wovanhu, onghee nee osha yela kutya vahapu okwa li va patelwa pondje, eemhito odo kwa li da pumbwa okukala davo, inava dula okudi mona shaashi osho kwa li sha tengenekwa okwa li ashike shoshiwana shishona,” Nashinge osho a ti ngaho.
Okwa ti oidjemo yomavalulo oo a katekwa owa eta ovanhu vahapu va kale ashike natango va tala momivalu dikulu.
Omupopiliko wongudu yoLandless People’s Movement, Lifalaza Simataa okwa ti omakateko aa otaa piyaaneke eenghendabala depangelo.
“Owa pumbwa ouyelele keshe efimbo opo u dule okuninga omafaneko nokuyandja omavatelo a pumbiwa. Osha pumbiwa unene kutya eshi hatu kendabala okulonga mo oupyakadi womaumbo, oluhepo, okuhena oilonga, eyopedu lehongo ile oikumungu i na sha nehongo, otwa pumbwa okukala tu shi kutya omivalu edi odi fike peni nosho yo eepelesenda,” Omupopiliko osho a ti ngaho.
Simataa okwa ti oshi li shidjuu nai okuninga eenghendabala dopamufika moNamibia.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
