Omukulunhuwiliki wehangano olo hali futila ovalihongi ledina Namibia Student Financial Assistance Fund (NSFAF), Kennedy Kandume, okwa ti ehangano otali ka tameka okufuta ovalihongi komwedi ovo hava mono omauwa okudja kulo okutameka momafiku 26 Apilili.
Eshi oshe ya konima eshi ongongahangano yovalihongi Etine loshivike sha dja ko ya pula opo NSFAF a tameke okuyandja oshimaliwa shomondjato shovahongwa pexulilo laApilili.
“Oshimaliwa eshi osha kwatela mo ovanhu vahapu, sha hala okutya oshe tu kwatela mo, oiputudilo nehongo lopombada. Opo oshimaliwa eshi shi yandjwe opu na ouyele wa pumbiwa okudja koiputudilo yehongo lopombada ndee eshi unene osho hashi eta okweenda kashona opo oshimaliwa shi futwe,” Kandume osho a ti ngaho Etine loshivike sha dja ko.
Pelesidente wongongahangano yovalihongi, Benhard Kavau, okwa ti ngee NSFAF okwa dopa okuninga eshi tava pula, ove na okuninga omunyanyo.
Eshi okwe shi popya pefimbo kwa li va ninga oshoongalele koshiputudilo shopombada shedina University of International Managment mOvenduka.
“Ongongahano yovalihongi oya pula opo oshimaliwa shomondjato shovalihongi shi futwe meendelelo keshe komwedi tashi tameke pexulilo laApilili.
Osha pumbwa okutulwa moilonga opo kukwashipalekwe kutya ovalihongi otava mono omauwa moshimaliwa omu unene ngaa shaashi ova taalela nale omaupyakadi kombinga yelihongo lavo,” Osho a ti ngaho.
Kavau okwa ti okuyandja evatelo loshimaliwa, ovalihongi Ovanamibia otava kala ve na omhito i fike pamwe yokulihonga nokwaalulila omauwa moshiwana.
“Eshi odula tai i komesho, ongongahangano yovalihong otai pula oiputudilo aishe yopombada opo i kale tai tumu eembapila odo da pumbiwa pefimbo koNSFAF. Ei onghatu ya fimana opo ku endelelifwe okufuta oshimaliwa eshi nokufuta oshimaliwa shelihongo lovahongwa pefimbo,” Osho a ti ngaho.
Natango onguduhangano yovalihongi oya denga vali omufindo kefimano lelongelokumwe loiputudilo noNSFAF opo shi kale shi pu okufuta oimaliwa yovalihongi.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
