Ovafuti voishoshela yokongulu ove na okudja oshimaliwa shi fike peemiliyona N$723 keshe omwedi ngee ongudu oyo hai ungaunga noshimaliwa shepangelo oya wanifa po ehalo lanakufya pelesidente Hage Geingob opo opendjela yovakulupe noingudu i wedelwe okudja poN$1400 fiyo N$3000.
Ngeenge epangelo ola wedele opendjela fiyo nande opo N$2000, ovafuti voishoshela yokongulu vaNamibia ove na okufuta eemiliyona N$482 keshe omwedi.
Omwaalu wovakulupe noingudu aushe kumwe ou hau pewa opendjela paife ngaha ou li 241 016.
Etumwalaka laye podula i pe neudo, Geingob okwa ti: “Manga inandi fiya po ombelewa, onde lineekela opendjela yovakulupe otai wedelwa fiyo oN$2000 ile N$3000.” Eshi okwa li sha tyapulwa keshe pamwe moshilongo nosha teelelwa kovakwati vopendjela, ovo kwa li va teelela Geingob eshi pitife nokuli manga ina fya.
Minista woimaliwa Iipumbu Shiimi, okwa li a teelelika opo a faneke omutengenekwafaneko wopashiwana wodula 2024/25 Etivali.
Omukwati wopendjela ou a popiwa naye koThe Namibian oshivike eshi, ashike edina laye itali hololwa, okwa ti pelesidente Nangolo Mbumba na wanife po ehalo laGeingob.
“Efyo laye ola luluma vahapu vomushe, shaashi okwa li e tuhole fye ovakulupe. Ohatu kala twa uda nai ngee epangelo ola shu na pedu ehalo laye,” Osho a ti ngaho.
Ashike nee, ovo ve na ounongo otave lipula ngee epangelo otali shi wanifa ngaa shili okuwedela opendjela noimaliwa ihapu ngaho.
Omushiivi nawa oikwamaxupilo, Omu Kakujaha-Matundu okwa ti okuwedela opendjela oshiwa shooshipandulifa, ashike kashi pu okuninga.
“Kandi wete ngee epangelo oli na ngaa oshimaliwa shi fike opo tashi dulu okuninga omawedelo oo,” Osho a ti ngaho. Omundjadjukununi woikwapolotika Henning Melber, okwa ti onghatu i li ngaho otai wedele ashike keemumbwe depangelo.
Okwa ti ongudu tai lele SWAPO otashi dulika i makelwe opo i ninge oshinima shi li ngaho medina lomahoololo neudo. “Ashike nee ove na okutula onghalo yoshimaliwa moshiponga ndee tava tete oshimaliwa osho hashi i koinima ikwao i lili, oyo nayo i li ya fimana unene mokukoleka eliko loshilongo,” Melber osho a ti ngaho.
Okwa ti natango okwa teelelika ngaa kutalwe ngee Shiimi otaame kokukaleka onghalo yoshimaliwa i li xwepo ile otaame komahoololo.
Arney Tjaronda, omupekaapeki koSimonis Storm Securities, okwa ti naku tali ke nawa koilanduli yokuwedela opendjela.
Rinaani Musutua wokoEconomic and Social Justice Trust, okwa ti omapopyo aGeingob okutya okwa hala okuwedela opendjela yovakulupe okwa li omukalo wokunana ovakulupe shi nasha nomahoololo.
“Ashike itashi kumwifa ngeenge SWAPO okwa wedele ovakulupe, eshi oteshi longifa ongokulanda omavi kovakulupe,” Osho a ti ngaho.
Okuwedela ovakulupe naku talike, shaashi N$1400 oi shona nai nokuxupifa ovanhu.
“Oshike ve lineekela omunhu a xupe koN$1400 komwedi, ovanhu vahapu ovatala movakulupe,” Musutua osho a ti ngaho.
Oshilyo shomopaliamente shongudu yoPopular Democratic Movement (PDM) Maximalliant Katjimune, okwa ti epangelo nali fimaneke ehalo laGeingob lokuwedela ovakulupe.
“Oimaliwa oyo ihai i ashike kovakulupe, ohai i nokovatekulu vavo. Ohai futu neengeshefa detu dinini naado dopokati nohai weda ko nokeliko letu. Osha fimana okuwedela oimaliwa oyo,” Osho a ti ngaho.
OSHO SHA TEELELWA MOMUTENGENEKWA
FANEKO
Melber okwa etela Shiimi onghenda, okuwete oudjuu ou ta longo nao paife ngaha. Okwa ti epangelo oli na eendjo, noipumbiwa ihapu ngaashi okufuta eendjo oko taku pula nale oshimaliwa shihapu, okutala po nawa peliko loshilongo opo oshapumbiwa neenghono omanga inaku ningwa omatokolo e li ngaha.
Eshi osha ulikwa konghatu opo Namibia eli sha ulikwa koFinancial Action Task Force, molwoumbudi woimaliwa oo wa ya pombada.
“Omanga tu na elineekelo kutya onghalo ei oyo pokafimbo ashike, otai shunifa eliko pedu neenghono,” Melber osho a ti ngaho.
OVANYASHA
Omupopiliko wehangano lovalihongi moNamibia, Dorthea Nangolo, okwa ti ehangano ola teelela li kufilwe ko kombinga yomukunda wovalihongi oo kwa li wa tulwa momutengenekwafaneko wo2022. “Fiyo onena, inaku tungwa omaumbo ovalihongi,” Osho a ti ngaho. Nangolo okwa ti oshimaliwa shihapu osha pumbwa okutulwa meengeshefa dovanyasha.
“Ovanangeshefa vashona paife ngaha inava fika okupewa oshimaliwa, noshi li shi djuu okumona oshimaliwa shokutameka ongeshefa yoye,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
