OVANENENHU ve dulife pomulongo okudja koilongo i dulife pomulongo ova teelelika ve uye kefudiko lomukokoli presidente Sam Nujoma mOvenduka mOlomakaya.
Eshi okwa li sha kolekwa kuminista womauyelele nomakwatafano opaungoba Emma Theofelus kendiki lomauyelele lepangelo Etitatu.
Omwaalu ou owa kwatela mo eepresidente dopaife naadi dikulu.
Nujoma, oo a xulifa mepupi lomido 95, ota ka fudikwa komaendo omapendafule mulotete laMarsa, napresidente Nangolo Mbumba okwa popya kutya efiku eli otali ka kala Oshoondaxa shopashiwana.
Odula ya dja ko, ovaleli ve li lwopo27 vaAfrica, omo mwa kwatelwa eepresidente 18, okwa li va koleka kutya otava holoka pefudiko lapresidente mukulu Hage Geingob.
“Epangelo laNamibia ola mona omakoleko okudja kovanhu vokondje yoshilongo – mwa kwatelwa eepresidente odo di koipundi neepresidente dikulu.
“. . . ovafimanekwa vamwe, ngaashi ovapedu presidente, ovaprima minista, omitwe domahangano opaiwana, ovakwateli komesho vomitumba dopaiwana neeminista doipambele yokondje, mokati kavakwao,” Osho a ti ngaho.
Theofelus okwa ti fiyo opapa, oilongo i li omulongo oya koleka kutya otai holoka, Angola, South Africa, Zibambwe, Ghana, Mozambique, Malawi, Tanzania, Finland, Cuba, naSahrawi Arab Democratic Republic.
Okwa ti omusholondo ou wopaife, nande ongaho otau dulu okuwedelwa shaashi ominiteli natango otai twikile nokumona omakoleko nomapulo kombinga yefudiko.
Theofelus okwa londoda oshiwana opo ashike shi landule ouyelele oo wa yandjwa nowa kolekwa koministeli.
Okwa ti oshikefa shomukokoli presidente okwa li sha teelelika okudja koKeetmanshoop sha yuka kOvenduka onghela, nomudimba otau ka kala moParliament Gardens opo oshiwana shi dule oku mu tala konima yolweendo olo la ningwa onghela mOvenduka.
Oshiwana otashi pulwa opo shiha faneke omudimba pefimbo olo tashi ke u tala.
Oshitufi dimbuluko shepangelo otashi ningwa nena omutenya koIndependence Stadium.
Oyeendifo yepangelo oya longekidilwa ovakalimo vomoshitopolwahoololo shaKhomas opo va dule okuya koshitufi dimbuluko nokepako.
Ouyelele welixwa po Theofelus okwa ti otau ka yandjwa.
EYEULULO LOSHIHONGWAFANO
Omupopiliko woSwapo Hilma Nicanor Etitatu okwa koleka kutya oshitufi shokuyeulula oshihongwafano shaNujoma e kwete okaana otashi ka ningwa pombelewa yakula yoSwapo, pombada opo oshihongwafano shi li, onghela.
Ongudu oya li yoo i na oshitufi dimbuluko shoku mu fimaneka poSam Nujoma Stadium Etine omutenya.
Onguloshi yEtitatu Swapo okwa li a tema oulamba pombelewa yaye yakula nokufimaneka Nujoma.
Kombinga yoshikefa shapresidente tashi tukifwa noitopolwahoololo oshikando shotete mondjokonona yoshilongo, Theofelus okwa yandja ombili koshiwana ponhele yepangelo komapuko oo a ningwa po ta ti oinima imwe oyo oi na ashike okuholoka pomafimbo e li ngaha.
Okwa pandula oshiwana molwelididimiko nokuliufa komilandu omanga kwa li tashi yandje efimaneko laxuuninwa komukokoli presidente.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
