“Molwomaulema etu, ove wete kutya itatu dulu okulonga oilonga ngaashi ovanhu aveshe.”
Shekupe Niilenge, omukongi woilonga, noha longifa okatemba.
Okwa ti kutya omahangano ahapu inaa hala okuyandja oilonga kovanhu ovo ve na omaulema.
Niilenge okwa ninga omaindilo omalideulo komahangano avali ashike kapu na nande olimwe le mu dengela.
Kehangano limwe, okwa ti kaume kaye umwe oo ehe na oulema okwa mona omhito yokulideula ashike oye kwa li a ninga eindilo tete.
“Ondi udite va fa ve tu ekelashi ongOvanamibia, va fa ngeno inave tu valula kutya fyee ovanhu,” Osho a ti ngaho.
Niilenge okwa ti kutya edilaadilo lokutya ovanhu ovo ve na omaulema kave shi okulesha nokushanga kali shi loshili.
“Onda hala ashike va tote ekwatelemo, opo ovanhu vahapu ve na omaulema va mone eemhito, shaashi ovanhu vahapu ve na omaulema paife ova hongwa inashi fa vali ngaashi nale.”
Epangelo otali ka xulifa po okulonga nomahangano oo itee liufa keeveta nomilandu dokufimaneka ovanhu aveshe puhe na okatongotongo, omukulunhu wefikopamwe lokuyandja oilonga Otniel Podewitz, osho a ti ngaho.
Okatendo oka popya kutya ovayandji voilonga nava tale tete kovakainhu novanhu ovo ve na omaulema.
Omapopyo aye aa okwe ya konima omupedu minista woipambele yomaulema Alexia Manombe-Ncube okwa li a pula ovayandji voilonga va xulife po omaudeko apuka kombinga yovanhu ve na omaulema nosho yo omatungo oo itaa dulu okulongifwa kovanaulema.
Olopota yaxuuninwa yoipambele yoilonga, ya dja momavalulo omudo 2023, oya ulika kutya ovanhu ove na omaulema moshikondo shoilonga ove na mo ashike eepelesenda 2.3 moNamibia domeepelesenda 46.2 dovanhu ovo ve na oilonga.
Eshi osha hala kutya ovanhu ve li 546 805 vomOvanamibia ovo ve na oilonga, omu na ashike ovanhu ve li 12 508 ve na omaulema.
Podewitz okwa ti okatendo otaka nghonopeke ombelewa yaye opo i popye nomahangano oo inaa hala okuliufa keeveta.
“Ovayandji voilonga ovo itave liufa komalombwelo inava pitikwa okuninga eengeshefa nepangelo nosho yo okumona omikanda donhumba,” Osho a ti ngaho.
Oinima aishe ei oya popiwa moAffirmative Action Act, okatukulwa 12.
Orben Muluti, hamushangandjai wehangano lovanhu ve na omaulema moNamibia okwa ti ovanhu vahapu ve na omaulema ohava mono oixuna okumona oilonga molwomilandu didjuu dokumona oilonga.
Okwa ti ovo hava ningi oukonakono voilonga inava deulwa okuningila ovanhu ovo ve na omaulema oukonakono ovo.
Muluti okwa ti oshinima eshi otashi holola neenghono “eitavelo lovayandji voilonga ovo ve wete kutya omunhu e na oulema ita dulu okulonga nande na kale e na omauhongelwe.”
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
