Eepelesenda di fike po98,5 dounona ovo va dalwa koomeme ve na ombuto yoHIV moNamibia odula ya dja ko okwa li va dalwa vehe na ombuto, ominista youndjolowele Kalumbi Shangula osho ya ti ngaho komutumba wehangano li na sha noukolele mounyuni ledina World Health Organisation (WHO) oshivike sha dja ko.
Okwa ti kutya oshilongo oshe shi pondola mokuxwepopaleka nokulwifa ombuto yoHIV nomukifi wohapatitis B odo hadi tandavele okudja kumeme da yuka kokaana.
Shangula okwa ti Namibia okwa pewa epapa kehangano loukolele lopaunyuni eshi eshi pondola moshinima eshi momudo 2020 nomudo 2021.
“Eepelesenda dokutandaveleka ombuto yoHIV okudja kumeme ya yuka kokaana okwa li di li 4,02 momudo 2020, odo di fike po603 dounona ve li 100 000 vadalwa nomwenyo, momudo 2021 okwa li kwa didilikwa ounona ve li 594 vomounona veli 100 000 ovo va dalwa nomwenyo,” Osho a ti ngaho.
Shangula okwa weda po vali ta ti omahongo opashiwana nao okwa yandja omauyelele kombinga yokulwifa ombuto yoHIV kovakwashiwana ovo va hala ounona, opo ve shi ninge noukeka.
“Omayakulo aa okwa twalwa koupangelo vashona vokomikunda nokeenhele dihapu dokuyandja omayakulo nomauyelele opaunamiti. Otwa deula ovanailonga vouhaku vomomikunda opo va yandje omayakulo e na ongushu,” Shangula osho a ti ngaho.
Minista okwa ti, ovanailonga vouhaku ovo ve li komikunda ova deulwa nohava ningi omatalelepo nooina younona fiyo ounona va pitilila ondodo yokukwatwa kombuto tai di kooina ngee va monika kutya kave na ombuto noihava nyamu vali.
Namibia okwa tula moilonga oshimaliwa shokuungaunga neepolohalama edi dokulwifa okutandaveleka ombuto yoHIV pokati kovadali nounona momudo 2022.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
