Eengudu dopolitika nadi fatulule nawa nghee da hala okukakandula po omaupyakadi aa e li moshilongo.
Omundjadjukununi woikwapolitika Rui Tyitende oshivike eshi sha dja ko okwa li a pula ovapolitika opo va ete pouyelele momaudeneko avo oo eendudu davo tadi ningi kutya otadi ka ungaunga naana ngahelipi noumaupyakadi oo e li moshilongo.okwa li ta popi peenghundafana doshiwana kombinga yeliko lopotika koshiputudilo shopombada shedina University of Science and Technology Etitatu, kwa li di li kombinga yaasho ovakwashiwana va pumbwa okutala kusho pefimbo leengudu deepolitika tadi ningi omaudaneko ado.
“Onda hala eengudu dopolitika di popye lela kombinga yoikumungu yakula momaudaneko ado, ndee inadi ninga ashike omaudaneko ongaho ‘eyokomesho laaveshe nosho yo eyambule po lovanyasha’.
“Otwa hala oinima ya yela, unene ngaa kombinga younamapya nounaimuna,” Tyitende osho a ti ngaho.
Okwa ti moshikondo shounamapya nounaimuna moNamibia ihamu talwa naana.
“Oshinima shimwe sha fimana twa pumbwa okukundafana opo tu kondjife oluhepo oshinima eshi shokukala inatu fimaneka ounamapya nounaimuna. Paushili woovene eenghendabala detu oda pumbiwa opo tu xulife po oshinima eshi ngee otwa hala okuya komesho nawa,” Osho a ti ngaho.
Okwa ti epangelo ohali longifa oshimaliwa shihapu moikulya yoshikukuta shi dulife mokulonga oikulya.
Tyitende natango okwa ti Ovanamibia ohava tale oukwatya wovaleli naapa va dja, ponhele yokutala komadilaadilo avo. “Ngeno okwa li heengudu dopolitika, ngeno kapu na omaudaneko, shaashi ove shi shi nawa kutya nande ngeno kapu na osho tashi ulike eyokomesho, ovanhu natango otava hoolola ashike.” Natango vali, omundjadjukununi woikwapolitika Ndumba Kamwanyah okwa ti opu na omwaka wa kula pokati komaudeneko oo haa ningwa pefimbo lomahoololo netulomoilonga lao.
“Eshi shi li momadilaadilo ovahoololi oshikumungu shokutota eemhito doilonga, oshikumungu shokumona oumaniti,ehongo li na ongushu nosho yo okuxulifa po oluhepo,” Osho a ti ngaho.
Okwa ti omaudaneko eengudu dihapu inaa lunduluka okuyelakanifa naao kwa li a ningwa pomahoololo akulu.
Omuleli wongudu yoIndependent Patriots for Change Panduleni Itula poshivilo opo okwa ti ovaleli ove na okukala va takamifa ngee tava ningi omaudaneko kombinga yoshimaliwa shokupewa ovanhu aveshe ovo ihava longo keshe komwedi. “Otwa pumbwa okukwashilipaleka lela kutya omaudaneko aa twa ninga otaa dulu ngaa okuningwa,” Osho a ti ngaho.
Itula okwa ti ovaleli ova pumbwa okukala ve na oshili ngee tava ningi omaudaneko ndee tave likaleke kokule neenghatu dopamaliudo ngee tava ungaunga nomaupyakadi opashiwana.
“Ndee ngee osho sho, kashi li mondjila kovakulupe okuvaudanekela oshinima osho itatu va pe,” Osho a ti ngaho.
Omunawino moinima yapamba eependjela Olga Katjiuongua okwa ti oshinima shokuhena oilonga osha lunduluka meedula dopaife,osho sha ningila ovalihongi vahapu vaha mone oilonga.
“Monakudiwa ovanhu vahapu ovo kwa li hava mono oixuna okumona oilonga okwa li ovanhu ovo vehe na ouhongelwe washa,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
