Etulomoilonga leendjabi dopashiwana ola taalela omatalululo, ashike ovanawino voinima ya pamba oilonga ove na omalipulo kombinga yoshinima eshi.
Omanga kwa teelelika omauwa ngee oshinima eshi osha tulwa moilonga, omunawino moipambele yoilonga Herbert Jauch okwa holola onghumwe kondjokonona yokuhaninga osho ovanhu va pumbwa nokonghalo yokuhena oilonga i li pombada.
Eshi oshe ya konima okabinete ka tambula ko etulomoilonga lokufuta ovanhu oshimaliwa shi fike poN$18 movili ngee oshi shona.
Etokolo eli la kwa telwa komesho kominsta yoipambele yoilongo nomatoto oilonga Utoni Nujoma, otali i moilonga muJanuali 2025.
Otaku tiwa oshimaliwa eshi tashi kala hashi futwa ovanhu movili otashi ka talululwa vali konima yeedula mbali.
‘KAPU NA OKUTULA EENDJABI PEDU’
Omukulunhuwiliki woinima ya pamba oilonga Lydia Indobo okwa ti oshinima eshi shokutula po oshimaliwa osho omunhu e na okufutwa movili inashi tya ovayandji voilonga ovo va hangika tava futu ovanailonga vavo oshimaliwa shi dule poN$18 movili nave shi shunife pedu, ashike osha ningilwa ashike ovanhu ovo hava futwa oshimaliwa shishona neenghono.
“Inashi pitikwa opo ovayandji voilonga va tule oshimaliwa osho hava futu ovanailonga vavo pedu, ndee ovayandji voilonga ovo hava futu nale oshimaliwa shi dulife osho tashi pulwa paife inave shi shuna pedu opo shi ninge oN$18 movili.
“Oshinima eshi otashi ti ashike omunhu na kale ta futwa oshimaliwa shi fike opo ngee oshi shona, ashike itashi ti inashi kala shi dulife po opo,” Osho a ti ngaho.
Pamhito ei, oshinima eshi osha kala ashike sha tulilwa po, ovatonateli vomaliko, ovanailonga moshikondo shounamapya nounaimuna, ovanailonga moshikondo shomatungo novanailonga vomomaumbo.
Oikondo ikwao oya kala tai yandje nokutambula eendjabi odo meemhito dihapu hadi kala dishona neenghono.
‘NATANGO INASHI WANA’
Ashike nande ongaho, Jauch okwa ti oshinima eshi itashi ningi mo lela elunduluko moshikondo shoilonga moNamibia.
“Natango oshi li pedu, eshi sha pumbiwa oshimaliwa tashi dulu okutwala onghalamwenyo yomunhu komesho,” Osho a ti ngaho.
Jauch okwa ti ngee osha tulwa moilonga nawa ndee ovayandji voilonga tave shi tambula ko, otashi dulu ngaa okuvatela.
Okwa ti vali eedula odo oshinima eshi osha kala nokudopa shaashi inashi kala sha nghonopalekwa nawa unene ngaa moshikondo shomatungo neameno lomaliko.
“Otu na oupyakadi wakula okukwashilipaleka kutya ovanhu otave shi landula, ndee eshi osha etwa komwaalu wovanhu vehe na oilonga oo u li pombada, oo we shi ninga shipu kovayandji voilonga opo va dule okumona ovanailonga noupu nokuvapa ofuto ndee ngee kave i hole otava dulu okumona omunhu umwe e lili,” Jauch osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
