Ovanailonga vokutonatela oifitukuti moSalambala Conservancy ova kala nokupombela omeva monata omonhele oyo i li momulonga waChobe okudja omwedi wa dja ko opo va xupife eendjabameva di li 200 odo da kala da damena monata monhele omo.
Eendjambameva odo oda dja monhele yedina Mutikila koshikandjohoololo shaKatima shokomikunda.
Ouministili womidingonoko, omakuti nomatalelepo okwa li wa ninga omboola hai pombo eelita domeva 12 000 keshe movili momudo 2019 opo va xupife eendjabameva 63 odo kwa li da damena monhele omo tuu omo.
Omunashipundi woSalambala Conservancy, Fabian Mavuna, Omaandaxa okwa ti elao linene keendajabameva edi da dama paife, shaashi omboola otai longo natango.
“Efundja olo hali kala ko ohali yadeke omulonga, ashike nee molwoshikukuta efundja inali uya neudo ndee paife otashi eta oupyakadi keendjabameva neengadu yoo.
“Otwa pumbwa opo kufewe eembola dihapu pokati kaNgoma, Lake Liambezi noLinyanti, shaashi omatando otaa pwiinine paife ndee oinamwenyo ei kai na vali apa tai i. Omupopiliko womunistili yomidingonoko, Romeo Muyunda, eshi kwa li a pulwa opo a tye ko sha Omaandaxa okwa ti ouministili ou na ouyelele kombinga yeendjabameva odo di li moupyakadi u li ngaha nowafa eembola di lii mbali petameko lodula ei.
Okwa ti ou oo ashike omukalo tau dulu okuvatela manga fiyo opefimbo lodula.
“Otu udite ko kutya onghalo omo eendjabameva di li kai wa notashi dulika shi pule efimbo opo omatando oo a hade omeva.
“Ashike nee, ohatu ungaunga nonghalo ei tu tale ngee pamwe opu na vali shimwe tashi dulu okuningwa shihe shi okupomba omeva meemboola.
“Ngee ope ya omumbwe, otashi dulika tu ninge eembola dihapu. Ngee osho inashi vatela, otu na okutwala eendjabameva edi keenhele odo di li popepi di na omeva a wana.
“Otu na kuninga keshe osho hatu dulu okuninga opo tu kwashilipaleke kutya eendjabameva otadi kala nomwenyo,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
